उल्हासनगर : थेरगाव क्वीन प्रकरण ताजं असतानाच आता उल्हासनगरात इन्स्टाग्रामवर दादागिरीचे व्हिडीओ बनवून टाकणं काही तरुणांना महागात पडलं आहे. कारण हे व्हिडीओ टाकून समाजात दहशत माजवण्याचा प्रयत्न करणाऱ्या पाच जणांना थेट जेलची हवा खावी लागली आहे.
उल्हासनगरात सोमवारी इन्स्टाग्रामवरील काही व्हिडिओ व्हायरल झाले होते. यात काही तरुण दादागिरीची भाषा वापरत शिवीगाळ करत होते. विशेष म्हणजे काही व्हिडिओमध्ये तरुणांच्या हातात बंदुकासुद्धा दिसत होत्या. यामध्ये 307, 302 असेही शब्दप्रयोग वापरण्यात आले होते. हे कलम हत्येचा प्रयत्न आणि हत्या यांचे असल्यानं संबंधित तरुण समाजात दहशत माजवून दादागिरी करण्याचा प्रयत्न करत असल्याचं पोलिसांच्या निदर्शनास आलं. त्यामुळं विठ्ठलवाडी पोलिसांनी या सर्वांचा शोध घेत कृष्णा कुंभार, विशाल कुंभार, अभय गायकवाड, रोशन मलिक आणि एक अल्पवयीन मुलगा अशा एकूण पाच जणांना अटक केली. यापैकी चौघांची न्यायालयीन कोठडीत, तर एकाची बालसुधारगृहात रवानगी करण्यात आल्याची माहिती विठ्ठलवाडी पोलीस ठाण्याचे वरिष्ठ पोलीस निरीक्षक संजय गायकवाड यांनी दिली आहे.
या व्हिडिओमध्ये दिसणारे तरुण हे गुन्हेगारी पार्श्वभूमीचे असून यातील एकावर तडीपारीची कारवाई सुद्धा प्रस्तावित आहे. या सर्वांचा उन्माद पोलीस ठाण्यात येताच कमी झाल्याचं पोलिसांनी म्हटलंय. यानंतर आता पालकांनी सुद्धा आपल्या मुलांकडे लक्ष ठेवण्याची गरज निर्माण झालीये.
संबंधित बातम्या :
Chandrapur Crime: माय-लेकीच्या नात्याला काळीमा! आईनंच सुपारी देऊन केली मुलीची हत्या