Gram Panchayat Election: नुकत्याच झालेल्या ग्रामपंचायत निवडणुकीत प्रत्यक्ष मतदान न घेता सरपंच, उपसरपंच आणि 8 सदस्य पदांचा लिलाव (Auction) करून विकण्यात आल्याचा प्रकार औरंगाबादच्या (Aurangabad) 'सेलूद' ग्रामपंचायतीमध्ये समोर आला होता. या सर्व लिलावाचा एक व्हिडीओ (Video) देखील समोर आला होता. तर या लिलावात एकूण 28 लाख 56 हजार रुपयांची बोली लावण्यात आली होती. मात्र, याच ग्रामपंचायतीमधून 4 लाखांची बोली लावून उपसरपंच म्हणून निवडून आलेल्या राजू गणपत म्हस्के यांनी आपल्या पदाचा राजीनामा देऊन अॅड. सिद्धेश्वर ठोंबरे यांच्यामार्फत थेट औरंगाबाद खंडपीठात धाव घेतली आहे. तर न्यायालयाने प्रतिवादी राज्य निवडणूक आयोग (State Election Commission), विभागीय आयुक्त, जिल्हाधिकारी, निवडून आलेले सरपंच, उपसरपंच आणि सदस्यांना नोटिसा बजावण्याचा आदेश दिला आहे.
राज्यभरात नुकत्याच सात हजारपेक्षा अधिक ग्रामपंचायतीच्या निवडणुका पार पडल्या आहे. ज्यात औरंगाबाद जिल्ह्यात 216 ग्रामपंचायतीच्या निवडणुका झाल्या आहे. दरम्यान यातील काही ग्रामपंचायत निवडणुका बिनविरोध झाल्याचे पाहायला मिळाले होते. याच बिनविरोध झालेल्या ग्रामपंचायतपैकी औरंगाबाद तालुक्यातील शेलुद ग्रामपंचायत देखील होती. मात्र एक व्हिडीओ सोशल मिडीयावर व्हायरल झाल्याने शेलुद ग्रामपंचायत निवडणुकीवर प्रश्न चिन्ह निर्माण झाले होते. ज्यात गावातील मंदिरासमोर ग्रामसभा बोलवून ग्रामपंचायत पदांचा लिलाव करण्यात आल्याचा प्रकार समोर आला होता. ज्यात सदस्य पदासाठी 70 हजारांपासून तर 2 लाखांपर्यंत बोली लागली होती. तर सरपंच पद साडेचौदा लाखात आणि उपसरपंच पद 4 लाखात विकल्याचा आरोप करण्यात आला होता.
तीन आठवड्यांनंतर पुढील सुनावणी
मात्र लिलाव न पटल्यामुळे 4 लाख देऊन उपसरपंच झालेल्या राजू म्हस्के यांनी आपल्या पदाचा राजीनामा देऊन हा सर्व प्रकार समोर आणला होता. त्यानंतर त्यांनी याप्रकरणी जिल्हाधिकारी यांना कारवाई करण्याबाबत निवदेन देखील दिले होते. तसेच आता त्यांनी याप्रकरणी औरंगाबाद खंडपीठात धाव घेत याचिका दाखल केली आहे. तर या याचिकेच्या अनुषंगाने खंडपीठाचे न्या. मंगेश पाटील आणि न्या. संतोष चपळगावकर यांनी प्रतिवादी राज्य निवडणूक आयोग, विभागीय आयुक्त, जिल्हाधिकारी, निवडून आलेले सरपंच, उपसरपंच आणि सदस्यांना नोटिसा बजावण्याचा आदेश दिला आहे. तसेच या याचिकेवर तीन आठवड्यांनंतर पुढील सुनावणी होणार आहे.
असा झाला लिलाव...
| अ.क्र. | पद | पदाची रक्कम | उमेदवारचे नाव |
| 1 | सरपंच | 1450000 | शकुंतला योगेश ससेमहाल |
| 2 | उपसरपंच | 400000 | राजू गणपत मस्के |
| 3 | एस.सी.महिला | 171000 | दर्शना राजू मस्के |
| 4 | ओबीसी महिला | 75000 | माधुरी अशोक चोरमारे |
| 5 | सर्व साधारण पुरुष | 125000 | मधुकर अंकुश चौधरी |
| 6 | सर्व साधारण महिला | 111000 | आशा भरत चौधरी |
| 7 | सर्व साधारण महिला | 121000 | शाहीन सुभान शहा |
| 8 | सर्व साधारण महिला | 151000 | द्वारकाबाई एकनाथ नरवडे |
| 9 | सर्व साधारण पुरुष | 201000 | ज्ञानेश्वर दत्तू नरवडे |
| 10 |
सर्व साधारण पुरुष |
51000 | किसन बळवंत चौधरी |
महत्त्वाच्या इतर बातम्या :
HSC Exam: बारावीच्या पहिल्याच पेपरला औरंगाबाद विभागात कॉपीची 32 प्रकरणं; सर्वाधिक 17 जण जालन्यातील