Maharashtra Rain News : राज्याच्या अनेक भागात सध्या चांगला पाऊस (Heavy Rain) पडत आहे. पावसाचा हा जोर पुढचे काही दिवस कायम राहणार आहे. हवामान अभ्यासक पंजाबराव डख (Panjabrao Dakh) यांनी दिलेल्या माहितीनुसार 5 ऑगस्टपर्यंत महाराष्ट्रातील (Maharashtra) अनेक जिल्ह्यांमध्ये खूप मोठा पाऊस पडण्याची शक्यता आहे. या कालावधीत महाराष्ट्रात काही ठिकाणी कडक ऊन देखील पडणार आहे. जिथे कडक ऊन पडणार त्या ठिकाणी चांगला पाऊसही पडणार असल्याचे डख महणाले. 


 उत्तर महाराष्ट्रात आणि पूर्व तसेच पश्चिम विदर्भात पावसाचा जोर वाढणार


जुलै महिन्यात सांगली, सातारा, कोल्हापूर सहित पश्चिम महाराष्ट्रात पावसाने जोरदार दणका दिला आहे. मात्र, आता उत्तर महाराष्ट्रात आणि पूर्व तसेच पश्चिम विदर्भात पावसाचा जोर वाढणार असल्याची माहिती पजाबराव डख यांनी दिली आहे. दरम्यान, या जोरदार पावसाच्या पार्श्वभूमीवर नागरिकांनी योग्य ती खबरदारी घ्यावी असं आवाहन प्रशासनाच्या वतीनं देखील करण्यात आलं आहे.


कोणत्या भागात पडणार जोरदार पाऊस?


पंजाबराव डख यांनी दिलेल्या माहितीनुसार, 5 ऑगस्टपर्यंत राज्यात चांगला मोठा पाऊस पडण्याची शक्यता आहे. आता रिमझिम स्वरूपाचा पाऊस बंद होणार आहे. मुसळधार पाऊस कोसळणार आहे. या काळात नदी-नाले भरून वाहतील असा इशारा पंजाबराव डख यांनी दिला आहे. या कालावधीत राज्यातील विदर्भ, मराठवाडा, उत्तर महाराष्ट्र विभागात चांगला पाऊस पडणार आहे. नागपूर, वर्धा, अमरावती, अचलपूर, वाशिम, अकोला, अकोट, बुलढाणा, जालना, सिंदखेड राजा, सिल्लोड, वैजापूर, जळगाव, मालेगाव, नाशिक, नंदुरबार, धुळे, इगतपुरी, छत्रपती संभाजीनगर या भागात चांगल्या पावसाची शक्यता आहे.


5 ऑगस्टनंतर महाराष्ट्रात पुन्हा कडक ऊन पडणार


पंजाबराव डख यांनी दिलेल्या माहितीनुसार, 5 ऑगस्ट नंतर महाराष्ट्रात पुन्हा एकदा कडक ऊन पडणार आहे. 5 ऑगस्ट नंतर दोन दिवस म्हणजेच 6 ते 7 ऑगस्ट दरम्यान महाराष्ट्रात कडक ऊन पडेल. त्यानंतर म्हणजेच 8 तारखेनंतर पुन्हा एकदा पावसासाठी पोषक परिस्थिती तयार होणार आहे. 8 ते 9 ऑगस्टपासून पुन्हा एकदा पावसाचा जोर वाढणार असल्याचे पंजाबराव डखांनी सांगितले. जुलै महिन्याप्रमाणेच ऑगस्टमध्येही चांगला पाऊस पडणार आहे. खरे तर, गेल्या वर्षी ऑगस्ट महिन्यात पावसाचा मोठा खंड पडला होता. मात्र, यावर्षी तशी परिस्थिती राहणार नाही असे डख यांनी म्हटले आहे.


महत्वाच्या बातम्या: 


सावधान! कोकणसह पश्चिम महाराष्ट्राला ऑरेंज अलर्ट, तर मुंबईसह विदर्भ आणि मराठवाड्यात यलो अलर्ट, हवामान विभागाचा अंदाज