Crime News : विरारमध्ये एक धक्कादायक घटना समोर आली आहे. चारित्र्यावर संशय घेऊन पतीने पत्नीची गळा आवळून हत्या केली आहे. प्रियंका उर्फ पिंकी पाटील असे हत्या झालेल्या महिलेचं नाव आहे. तर वैभव पाटील असं संशयीत पतीचं नाव आहे. हत्येनंतर वैभव याच्या व्हॉटसअॅप स्टेटसवरुन त्याने पत्नीची हत्या केल्याचे उघड झाले. सध्या तो फरार असून त्याच्या मित्राला पोलिसांनी बेड्या ठोकल्या आहेत.
याबाबत मिळालेल्या माहितीनुसार, विरारच्या शंकर पाड्यातील जीवदानी अपार्टमेंटमध्ये राहणाऱ्या प्रियांका उर्फ पिंकी पाटील हिचा मृतदेह 1 फेब्रुवारी रोजी तिच्या राहत्या घरात विरार पोलिसांना मिळाला होता. मृतदेहाचा वास येत असल्याने शेजाऱ्यांनी घर मालकाला बोलावून विरार पोलिसांच्या मदतीने घरात प्रवेश केला. त्यावेळी मयत प्रियंकाचा मृतदेह कुजलेल्या अवस्थेत मिळून आला होता. मृतदेह मिळाल्यानंतर पोलिसांनी आकस्मिक मृत्यूचा गुन्हा दाखल केला होता. त्यानंतर मृत प्रियांका हिची बहिण बबिता भोईर हिच्याकडे चौकशी केली. यावेळी पोलिसांना माहिती मिळाली की, प्रियांका आणि तिचा पती वैभव पाटील यांनी घरातून पळून जावून लग्न केलं होतं. त्यानंतर 4 जानेवारीपासून दोघे विरार येथे एका घरात भाड्याने राहत होते. वैभव प्रियांकाच्या चारित्र्यावर संशय घेत असल्याची माहिती पोलिसांना दिली.
माहिती मिळाल्यानंतर पोलिसांनी पती वैभवच्या फोनवर त्याला संपर्क साधण्याचा प्रयत्न केला. परंतु, त्याचा फोन लागत नव्हता. त्याचवेळी मृत प्रियांकाचा भाऊ किरण जाधव याने पोलिसांना माहिती दिली की, संशयीत आरोपी पती वैभव पाटील याने दोन दिवसापूर्वी व्हॉटसअॅपवर विचित्र स्टेटस ठेवला होता. किरण याने वैभवच्या स्टेटसचा स्क्रिनशॉट पोलिसांना दिला. त्यावर वैभव पाटील याने आई वडिलांना उद्देशून, सॉरी मम्मी पापा मी मोठं पाऊल आज घेणार आहे, असा स्टेटस ठेवला होता. याबरोबरच बहिणीला उद्देशून सॉरी ताई, असा स्टेटस ठेवला होता. त्यामुळे पोलिसांचा संशय अधिक बळावला. त्यात शवविच्छेदन अहवालात प्रियांकाची गळा आवळून हत्या केल्याचे समोर आले.
पोलिसांनी प्रियांकाच्या हत्येबाबत वैभव याच्यावर गुन्हा दाखल केला आणि अधिक तपास सुरू केला. यावेळी वैभव पाटीलचा मित्र संकेत राऊत प्रियंकाचा खून करताना साथीदार होता. माहिती मिळाल्यानंतर त्याला विरार पोलिसांनी अटक केली आहे. तर वैभव पाटीलचा शोध विरार पोलिस घेत आहेत, अशी माहिती विरार पोलिस ठाण्याचे वरिष्ठ पोलीस निरीक्षक राजेंद्र कांबळे यांनी दिली.
महत्वाच्या बातम्या