Maharashtra Political Updates: शहाजीबापूंचे नाव महाराष्ट्राला माहीत नाही, असं कोणी नसेल इतकी प्रसिद्धी आमदार शहाजीबापू पाटलांना (Shahajibapu Patil) मिळाली आहे, मात्र कोट्यवधींची कामं करून आणि दुष्काळी सांगोल्याला (Sangola News) जवळपास 8 टीएमसी पाणी मिळवून दिल्यावर आता तरी त्यांचं लीड वाढणार का? असा प्रश्न सध्या शहाजीबापूंचे जिवलग मित्र खासदार रणजित निंबाळकर (MP Ranjeetsingh Nimbalkar) यांना पडला आहे. सांगोला तालुक्यातील कोळा येथे बापुंच्या वाढदिवसानिमित्त बैलगाडा शर्यतीसाठी निंबाळकर आले होते. बापूंच्या शेकडो कार्यकर्त्यांनी त्यांच्या वाढदिवसानिमित्त 10 जेसीबीमधून टनभर झेंडूच्या फुलांची उधळण करत त्यांच्या गावातून वाजतगाजत मिरवणूक काढली. यानंतर झालेल्या सभेत बोलताना निंबाळकर यांनी कार्यकर्त्यांना सवाल करत यंदा बापूंचे लीड वाढवण्यासाठी प्रयत्न करण्याचं आवाहन केलं आहे.
आमदार शहाजीबापू पाटील यांनी गेल्या काही महिन्यात शेकडो कोटी रुपयांचा निधी तालुक्यासाठी आणला आहे. राजेवाडीचे नव्यानं 1 टीएमसी पाणी, देवघराची 1 टीएमसी पाणी, टेम्भूचं 5 टीएमसी पाणी आणि म्हैसाळचं पाणी असं मिळून जवळपास 8 टीएमसी पाणी बापूंनी तालुक्याला मिळवून दिल्याचा दावा खासदार निंबाळकर यांनी केला आहे. माझ्या फलटण पेक्षाही जास्त पाणी टेलला असणाऱ्या दुष्काळी सांगोला तालुक्याला जादा मिळणार असल्यानं हे श्रेय आमदार शहाजीबापू यांचंच असल्याचं त्यांनी सांगितलं.
पुढची माढा लोकसभा अथवा सांगोला विधानसभेची निवडणूक पाण्यावर होणार नाही, हा शब्द आम्ही पूर्ण केल्याचं निंबाळकर यांनी सांगितलं. शहाजीबापूंसोबत राष्ट्रवादीचे जिल्हाध्यक्ष माजी आमदार दीपक साळुंखे, उद्योजक भाऊसाहेब रुपनर, भाजप जिल्हाध्यक्ष चेतन केदार असं नेते असताना किमान यंदा तरी बापूंचे लीड वाढवायचं काम करावं लागेल, असं आवाहन निंबाळकर यांनी कार्यकर्त्यांना केलं आहे.
सांगोला शेकापचा बालेकिल्ला, आगामी विधानसभेत शहाजीबापूंचं भवितव्य काय?
सांगोला तालुका हा पहिल्यापासून शेकापचा बालेकिल्ला असला तरी गेल्यावेळी ज्येष्ठ आमदार कै. गणपतराव देशमुख यांचे नातू डॉ. अनिकेत देशमुख यांच्यासोबत झालेल्या अटीतटीच्या निवडणुकीत आमदार शहाजीबापू पाटील हे केवळ 768 मतांच्या निसटत्या फरकानं विजयी झाले होते. आता डॉ. अनिकेत देशमुख आणि डॉ. बाबासाहेब देशमुख या दोन चुलत भावंडानी सांगोला तालुक्यातील शेकापची ताकद पुन्हा एकवटण्याचं काम सुरू केल्यानं बापूंच्या समोरची चिंता नक्कीच वाढणार आहे. यातच राष्ट्रवादीचे जिल्हाध्यक्ष माजी आमदार दीपक साळुंखे हे अजित पवार गटात आल्यानं बापूंची ताकद वाढणार असली तरी दीपक साळुंखे यांनाही 2024 मध्ये विधानसभा निवडणूक लढण्याचे वेध लागले असल्यानं खासदार निंबाळकर यांनी त्यांच्या समोरच शहाजीबापूंचं लीड वाढविण्याचं आवाहन कार्यकर्त्यांना करत एका दगडात दोन पक्षी मारले आहेत. अजून जरी विधानसभेला वेळ असला तरी शहाजीबापूंच्या समोर उमेदवार कोण-कोण असणार यावर बापूंचं भवितव्य अवलंबून आहे. यामुळेच यंदा बापूंचं लीड वाढवण्याचं आवाहन करयाची वेळ खासदार रणजित निंबाळकर यांच्यावर आली आहे.