मुंबई - भाजपच्या अधिकृत वेबसाईटवर खासदार रक्षा खडसे यांच्या नावाखाली आक्षेपार्ह उल्लेख करण्यात आला होता. यासंदर्भात बोलताना भाजप प्रदेशाध्यक्ष चंद्रकांत पाटील म्हणाले की, याच्यामागे कोण आहे हे भाजपा नक्कीच शोधून काढेल व कारवाई करेल. गृहमंत्री अनिल देशमुखांच्या ट्वीटला रिट्विट करत त्यांनी म्हटलं आहे की, यामागे कोण आहे त्यांचा भाजपा नक्कीच शोधून काढेल व कारवाई करेल. मात्र गृहमंत्री जी, तुम्हाला खरंच महिला सन्मानाचा इतका कळवळा असता, तर असा बदनामीकारक मजकुर आपण कधीच ट्विटमध्ये वापरला नसता, असं चंद्रकांत पाटील यांनी म्हटलं आहे.
काय म्हणाल्या रक्षा खडसे
या प्रकारावर बोलताना रक्षा खडसे यांनी म्हटलं की, कालच ही गोष्ट आपल्याला कळली होती. त्यावेळी आपण भाजपच्या अधिकृत वेबसाईटवर जाऊन पाहिलं असता हे दिसून आलेलं नाही. त्यामुळे पक्षाकडून असं झालं असेल आपल्याला वाटत नाही. पक्षाच्या वेबसाईटचा स्क्रिनशॉट काढून त्याचा हा दुरुपयोग केला गेला असावा. या संदर्भात आपण पोलिसांना कळवले असून पोलीस त्याचा शोध घेत आहेत. त्यातून सत्य काय ते बाहेर येईल. मात्र हे कुणी केलं असेल मग ते सत्ताधारी असू देत अथवा विरोधक असू दे एखाद्या महिला लोकप्रतिनिधीची अशी बदनामी करणं योग्य नाही. झाल्या प्रकारानं मला दुःख झालं आहे. पक्ष देखील याचा खुलासा करेलच, असं खासदार रक्षा खडसे यांनी म्हटलं आहे. माझं यासंदर्भात काल पोलीस अधीक्षकांसोबत बोलणं झालं आहे. ते देखील याप्रकरणी माहिती घेत आहेत. पण सध्या सोशल मीडियाचं जग एवढं मोठं झालेलं आहे, तंत्रज्ञान एवढं पुढे गेलं आहे. त्याचा वापर करुन एखादी खोटी गोष्टही खरी केली जाते. मला शंका आहे की, फोटोशॉप करुनच या गोष्टी करण्यात आल्या आहेत, असं त्या म्हणाल्या.
भाजपच्या अधिकृत वेबसाईटवर आक्षेपार्ह उल्लेखाबाबत खासदार रक्षा खडसे म्हणतात....
असं कृत्य करणाऱ्यांना जेलमध्ये टाकलं पाहिजे- गुलाबराव पाटील
कोणत्याही महिलेबाबत कुणीही असं आक्षेपार्ह पोस्ट टाकत असेल तर अशा व्यक्तीला केवळ चौकशी नव्हे तर शिक्षा केली गेली पाहीजे. कारण महिलांचा सन्मान करणारं हे राज्य आहे आणि देश आहे. अशा प्रकारचा चावटपणा जर कुणी करत असेल तर त्याला जेलमध्ये टाकलं पाहिजे, अशी प्रतिक्रिया जळगाव जिल्ह्याचे पालकमंत्री गुलाबराव पाटील यांनी दिली आहे.
भाजपच्या वेबसाईटवर रक्षा खडसेंच्या नावाखाली आक्षेपार्ह शब्द, गृहमंत्र्यांकडून दखल
काय आहे प्रकरण?
BJP.org ही भाजपची अधिकृत वेबसाईट आहे. या भाजपच्या अधिकृत वेबसाईटवर सध्या रक्षा खडसे यांच्या नावापुढे कोणताही आक्षेपार्ह उल्लेख करण्यात आला होता. तो आक्षेपर्ह उल्लेख तत्काळ हटवण्यात आला. केवळ महाराष्ट्रातीलच नाही, तर संपूर्ण देशभरातील भाजपच्या सर्व खासदारांची यादी या वेबसाईटवर आहे. जेव्हा रक्षा खडसे यांच्या नावापुढील आक्षेपार्ह उल्लेखाचा स्क्रिनशॉर्ट पत्रकार स्वाती चतुर्वेदी यांनी ट्विटरवर शेअर केला त्यानंतर हे प्रकरण उघडकीस आलं. हा सर्व प्रकार गुगल ट्रान्सलेशनमुळे झाल्याची शक्यता वर्तवण्यात येत आहे.
गृहमंत्र्यांचा कारवाईचा इशारा
गृहमंत्री अनिल देशमुख म्हणाले की, "भाजपच्या अधिकृत वेबसाईटवर महाराष्ट्रातील भाजप खासदार रक्षा खडसेजी यांचं अपमानजनक वर्णन पाहून धक्का बसला. अशाप्रकारे महिलांचा अपमान करणाऱ्यांची महाराष्ट्र सरकार गय करणार नाही. भाजपनं दोषींवर तत्काळ कार्यवाही करावी, अन्यथा महाराष्ट्र सायबर सेल कारवाई करेल."