Beed District: बीड जिल्ह्यातील माजलगाव तालुक्यातील शिंदेवाडी येथे एक धक्कादायक घटना घडली आहे. येथे आपल्या मित्राच्या लग्नाच्या आधी निघालेल्या मिरवणुकीमध्ये डीजेच्या ठेक्यावर तरुण बेधुंद होऊन नाचला आणि त्यानंतर काही क्षणात त्या तरुणाचा हृदयविकाराच्या झटक्याने मृत्यू झाल्याची खळबळजनक घटना घडली आहे. वैभव राऊत (25 वर्षीय) असे या मृत तरुणाचे नाव आहे
मिळालेल्या माहितीनुसार, माजलगावच्या शिंदेवाडीमध्ये रविवारी माने आणि पुढचे कुटुंबामध्ये विवाह सोहळा पार पडला. या लग्नसोहळ्यातील वधू आणि वर दोघेही शिंदे वाडीचे रहिवाशी आहेत. अक्षय माने या मित्राच्या लग्नासाठी माजलगाव येथून अनेक मित्र लग्नासाठी आले होते. यातच वैभव राऊत हा सुद्धा मित्रासोबत या लग्नाला आला होता. लग्न सायंकाळचे होते. लग्नापूर्वी नवरदेवाला मारुतीच्या मंदिरात वाजत गाजत नेऊन मानपान करण्याची मोठी परंपरा येथे आहे. सायंकाळी सहा- साडेसहाच्या सुमारास लग्नापूर्वी मारुतीला पाया पडण्यासाठी नवरदेवाची मिरवणूक काढण्यात आली. त्यावेळी सुरू असलेल्या वाद्यांच्या तालावर सर्व तरुण मंडळी बेधुंद नाचत होते. विशेष म्हणजे या लग्नसोहळ्यातील दोन्ही कुटुंब ही याच गावातील असल्यामुळे गावातील आणि परिसरातील बरेच लोक या लग्नासाठी शिंदेवाडी मध्ये आले होते. मिरवणुकी वेळी सुरू असलेल्या वाद्यांच्या तालावर सर्व तरुण मंडळी बेधुंद नाचत होती. अगोदरच दिवसभर असलेला उन्हाचा पारा व त्यातच बेधुंद नाचणे बराच वेळ सुरू होते.
मिरवणूक लग्नस्थानी येताच तेथे वैभव राऊत मित्रांसह खुर्चीवर बसला. तहानेने व्याकूळ झालेल्या वैभवने एका दमात पाणी पिले. यादरम्यान त्याला ह्रदयविकाराचा तीव्र झटका आला. त्यामुळे उपस्थित सर्व लोकांमध्ये गोंधळ उडाला. अचानक घडलेल्या या घटनेमुळे लग्न मंडपातील उपस्थितांमध्ये चांगलाच गोंधळ उडाला. लग्न सोहळ्यातील उपस्थितांनी वैभवला लागलीच माजलगावच्या खाजगी दवाखान्यात दाखल केले. येथे डॉक्टरांनी त्याला तपासून मृत घोषित केले. लग्न सोहळ्यामुळे आनंदित असलेल्या वातावरणामध्ये अचानक शांतता पसरली आणि वैभवच्या मृत्यूची बातमी पसरताच गावावर शोककळा पसरली.