जबलपूर: मध्य प्रदेशमध्ये विधानसभा निवडणुकीमुळे (Madhya Pradesh Election 2023) राजकीय वातावरण तापले असताना आता दुसरीकडे पक्षांतर्गत नाराजी उफाळून येत आहे. शिस्तबद्ध ओळखल्या जाणाऱ्या भाजपात (BJP) उमेदवारीवरून मोठी नाराजी असल्याचे चित्र आहे. पक्षाचे मध्य प्रदेश निवडणूक प्रभारी आणि केंद्रीय मंत्री भूपेंद्र यादव (Bhupendra Yadav) यांना त्यांच्याच पक्षाच्या कार्यकर्त्यांनी धक्काबुक्की केल्याची घटना घडली आहे.
भाजपच्या जबलपूरमधील विभागीय कार्यालयात कार्यकर्त्यांनी निवडणूक तिकीट वाटपावरून गोंधळ घातला. केंद्रीय मंत्री आणि मध्य प्रदेश निवडणूक प्रभारी भूपेंद्र यादव यांनाही भाजप कार्यकर्त्यांनी धक्काबुक्की केली. शहराच्या उत्तर मध्य विधानसभा मतदारसंघातून बाहेरच्या उमेदवाराला तिकीट दिल्याने संतप्त झाले. तसेच त्यांच्या संरक्षणासाठी असलेल्या सशस्त्र जवानालादेखील कार्यकर्ते जुमानले नाहीत, त्यांनाही धक्काबुक्की करण्यात आली.
यावेळी भाजप प्रदेशाध्यक्ष विष्णू शर्मा यांच्याविरोधात घोषणाबाजी आणि आक्षेपार्ह टिप्पणीही करण्यात आली. मात्र, नंतर पत्रकारांशी बोलताना केंद्रीय मंत्री भूपेंद्र यादव यांनी कार्यकर्त्यांची समजूत काढणार असल्याचे सांगितले. भाजप कार्यालयात झालेल्या गोंधळाचा व्हिडिओ सध्या सोशल मीडियावर व्हायरल होत आहे.
आज भाजपने मध्य प्रदेश विधानसभा निवडणुकीसाठी आपली पाचवी यादी जाहीर केली. यामध्ये जबलपूरच्या उत्तर मध्य विधानसभा मतदारसंघातून अभिलाष पांडे यांना उमेदवारी देण्यात आली. यानंतर माजी मंत्री शरद जैन यांचे संतप्त समर्थक, आता पक्षात परतलेले माजी बंडखोर नेते धीरज पात्रिया आणि नगरसेवक कमलेश अग्रवाल यांनी भाजपच्या विभागीय बैठकीत जबरदस्तीने प्रवेश केल्याचे सांगण्यात येते. त्यांनी प्रदेशाध्यक्ष विष्णूदत्त शर्मा यांच्या विरोधात घोषणाबाजी करत गोंधळ घातला गेला.
नाराज कार्यकर्त्यांचा तासभर गदारोळ
यावेळी संतप्त कार्यकर्त्यांनी बैठकीत उपस्थित केंद्रीय मंत्री आणि मध्य प्रदेश निवडणूक प्रभारी भूपेंद्र यादव यांनाही धक्काबुक्की केल्याचे सांगण्यात येत आहे. सुमारे तासभर भाजपच्या विभागीय कार्यालयात गोंधळ सुरू होता. या दरम्यानच्या काळात शिवीगाळ झाल्याचेही सांगण्यात येत आहे. संतप्त असलेल्या कार्यकर्त्यांनी सुरक्षा रक्षकांनाही धक्काबुक्की करत खाली पाडले. या संपूर्ण घटनेचा व्हिडिओ सोशल मीडियावर व्हायरल होत आहे.
त्यानंतर पत्रकारांशी संवाद साधताना केंद्रीय मंत्री भूपेंद्र यादव म्हणाले की, आपण संतप्त कार्यकर्त्यांची समजूत काढणार असून प्रसारमाध्यमे निघताच कार्यकर्त्यांशी चर्चा केली जाईल. आपल्या गार्डसोबत हाणामारी झाल्याचाही त्यांनी इन्कार केला. त्याचवेळी नाराज कार्यकर्ता मनीष जैन यांनी या जागेवरून पक्षाने उमेदवार न बदलल्यास आम्ही निवडणुकीत काम करणार नाही, असे सांगितले.