Jammu Kashmir Encounter: जम्मू काश्मीरमधील श्रीनगर शहरातील झाकुरा भागात आज सकाळी सुरक्षा दल आणि दहशतवाद्यांमध्ये चकमक झाली. यामध्ये दोन दहशतवाद्यांचा खात्मा करण्यात जवानांना यश आलं आहे. खात्मा करण्यात आलेले दहशतवादी हे लष्कर-ए-तोयबा आणि टीआरएफ या दहशतवादी संघटनांचे दहशतवादी होते. दरम्यान, पोलिसांनी हा दशहतवाद्यांकडून शस्त्रदेखील जप्त केली आहेत. ठार करण्यात आलेल्या दहशतवाद्यांपैकी एकाचे नाव हे इखलाक हजम असे आहे. अनंतनागच्या हसनपोरा येथे अलीकडेच झालेल्या एचसी अली मोहम्मद यांच्या हत्येच्या कटात त्याचा सहभाग होता.
दरम्यान, भारतीय सुरक्षा दलाची जम्मू-काश्मीरमध्ये दहशतवाद्यांविरोधात सुरू असलेली कारवाई वेगाने सुरू आहे. जेणेकरून काश्मीर खोऱ्यात शांतता आणि सुव्यवस्था राखता येईल. नुकतेच गृह राज्यमंत्री नित्यानंद राय यांनी राज्यसभेत सांगितले की, जम्मू-काश्मीरमधील कलम 370 रद्द केल्यानंतर आतापर्यंत 439 दहशतवादी मारले गेले आहेत. या कालावधीत केंद्रशासित प्रदेशात 541 दहशतवादी घटनांची नोंद झाली आहे. तसेच, या घटनांदरम्यान सार्वजनिक मालमत्तेचे कोणतेही मोठे नुकसान झाले नाही. मात्र, वैयक्तिक मालमत्तेचे सुमारे 5.3 कोटी रुपयांचे नुकसान झाल्याचा अंदाज आहे.
३ फेब्रुवारीला उत्तर काश्मीरच्या बांदीपोरा जिल्ह्यात पोलीस आणि लष्कराने केलेल्या संयुक्त कारवाईत, लष्कर ए तोयबाच्या एका दहशतवाद्याला अटक करण्यात आली होती. त्याच्या ताब्यातून शस्त्रास्त्रे आणि दारूगोळाही जप्त करण्यात आला होता. बांदीपोरा येथील चंदरगीर हाजिन परिसरातून ही अटक करण्यात आली.
पोलिसांनी दिलेल्या माहितीनुसार, प्राथमिक चौकशीत त्याने स्वत:ची ओळख शब्बीर अहमद दार अशी सांगितली आहे. यापूर्वी 30 जानेवारीलाही बडगाम आणि पुलवामा जिल्ह्यात झालेल्या चकमकीत सुरक्षा दलांनी लष्कर-ए-तैयबा आणि जैश-ए-मोहम्मदच्या 5 दहशतवाद्यांना ठार केले होते. मारल्या गेलेल्या दहशतवाद्यांमध्ये जैशचा कमांडर जाहिद वानी आणि एका पाकिस्तानी दहशतवाद्याचाही समावेश आहे.
महत्त्वाच्या बातम्या: