Devmanus 2 Update : झी मराठीवरील अनेक मालिकांनी प्रेक्षकांच्या मनात अढळ स्थान निर्माण केलं आहे. यापैकी एक मालिका म्हणजे देवमाणूस (Devmanus 2). या मालिकेच्या पहिल्या पर्वाने गेल्या वर्षी प्रेक्षकांचा निरोप घेतला. या मालिकेत मुख्य भूमिका साकारणारा अभिनेता किरण गायकवाड याच्या अभिनयाचं देखील प्रचंड कौतुक झालं. या मालिकेच्या शेवटच्या भागानंतर प्रेक्षक फार आतुरतेने दुसऱ्या भाग कधी येणार याची वाट पाहात होते. प्रेक्षकांची उत्सुकता फार काळ न ताणता अल्पावधीतच ‘देवमाणूस 2’ ही मालिका प्रेक्षकांच्या भेटीस आली आणि मालिकेच्या या पर्वाने देखील प्रेक्षकांना टीव्ही स्क्रीनला खिळवून ठेवलं आहे.


या मालिकेत प्रेक्षकांनी पाहिलं की, देवीसिंग हा नटवर बनून गावात आला होता. मात्र, आता त्याने पुन्हा एकदा आपला ‘डॉक्टर अजितकुमार देव’ हा मुखवटा परिधान केला आहे. ‘देवमाणूस’ या मालिकेच्या शेवटी डिंपल आणि अजितकुमार देव यांचं लग्न मध्यातच मोडलं होतं. पण, आता दुसऱ्या सीझनमध्ये पुन्हा एकदा या दोघांचं लग्न लागणार आहे.


मालिकेत येणार मोठा ट्विस्ट!


यंदा डिंपल आणि अजितचं लग्न तर लागणार आहे, मात्र यावेळी एक मोठा ट्विस्ट पाहायला मिळणार आहे. डिंपलशी लग्न केल्यानंतर अवघ्या दुसऱ्याच दिवशी अजितचा मृत्यू होणार आहे. नव्या प्रोमोमध्ये हा थरार पाहायला मिळाला आहे. अनेकींना लग्नाची वचनं देऊन देवमाणूस अखेर डिंपलशी संसार थाटणार आहे. मात्र, काहीच क्षणानंतर डिंपल आणि अजित एका जंगलात जखमी अवस्थेत दिसतात. तर, अजितवर कुणीतरी गोळी झाडताना देखील दिसलं आहे. आता खरंच अजितचा अंत होणार की, ‘देवमाणूस’ पुन्हा नवी खेळी खेळणार, हे पाहणे अतिशय मनोरंजक ठरणार आहे.  


पाहा व्हिडीओ :



झी मराठीवरील ‘देवमाणूस’ या मालिकेने आपल्या वेगळ्या कथानकामुळे लोकप्रियतेचं शिखर गाठलं होतं. मालिकेच्या कथानकाने प्रेक्षकांना खिळवून ठेवलं आणि प्रेक्षकांनी या मालिकेला पसंती दर्शवली. साताऱ्यातील लहानशा खेडेगावात लोकांची फसवणूक करणाऱ्या ‘डॉ. अजित कुमार देव’ उर्फ ‘देवी सिंग’ या बोगस डॉक्टरची ही कथा होती. अभिनेता किरण गायकवाड याने अजित कुमार देवची भूमिका साकारली आहे.


हेही वाचा :



LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha