One hour special episode : येत्या रविवारी रंगणार 'या' दोन मालिकांचे एक तासाचे विशेष भाग

Marathi Serial : प्रेक्षकांसाठी यंदाचा रविवार खास असणार आहे. कारण प्रेक्षकांच्या आवडीच्या मालिकांचे एक तासाचे विशेष भाग रंगणार आहेत.

One hour special episode : ओटीटी माध्यमाने स्वत:चा वेगळा ठसा उमटवला असला तरी मराठी मालिकांचादेखील एक वेगळा प्रेक्षकवर्ग आहे. आजही कित्येक घरात संध्याकाळी 7 वाजता टिव्ही लावली जाते ती रात्रीपर्यंत सुरूच असते. घराघरांत उत्साहाने मालिका पाहिल्या जातात. आता याच मालिकांमध्ये रंजक वळणे येणार आहेत. येत्या रविवारी प्रेक्षकांच्या आवडत्या मालिकांचे एक तासाचे विशेष भाग रंगणार आहेत. 

येत्या रविवारी म्हणजेच 6 फेब्रुवारीला  'माझी तुझी रेशीमगाठ' आणि 'तुझ्या माझ्या संसाराला आणि काय हवं' या दोन मालिकांचे एक तासाचे विशेष भाग रंगणार आहेत. या दोन्ही मालिका सध्या रंजक वळणावर पोहोचल्या असून मालिकेत आता पुढे काय घडणार याची प्रेक्षकांमध्ये कमालीची उत्सुकता आहे.

'माझी तुझी रेशीमगाठ' (Mazhi Tuzhi Reshimgath)
'माझी तुझी रेशीमगाठ' या मालिकेत यशच्या अपघातानंतर नेहा यशला भेटण्यासाठी त्याच्या घरी जाते पण सिम्मी काकू तिला तिच्या गरीबीवरुन सुनावते आणि यशपासून लांब राहा सांगते. दुखावलेली नेहा यशला शंभर रुपयात दिवस काढायचं चॅलेंज देते. नेहाला जाणीव होते की, कदाचित यशच्या बाबतीत आपण अतिरेक केला. पण घडलेल्या घटनांमुळे यश निर्णय घेतो की यापुढे नेहाला जबरदस्ती प्रेमाचा स्वीकार करायला लावायचा नाही. मैत्रीचा हात पुढे करण्यासाठी आलेल्या नेहाच्या हातात यश मात्र रिलिविंग लेटर देऊन सांगतो की पुढच्या चार दिवसांत ती नोकरी सोडून जाऊ शकते. यश नेहाच्या नात्यातलं हे रंजक वळण या महाएपिसोडमध्ये पाहायला मिळणार आहे. काय असेल यापुढे नेहाचा निर्णय हे येत्या आठवड्यात प्रेक्षकांना कळेल.

'तुझ्या माझ्या संसाराला आणि काय हवं' (Tuzya Mazya Sansarala Ani Kay Hava)
'तुझ्या माझ्या संसाराला आणि काय हवं' या मालिकेत सध्या अदिती आणि सिद्धार्थच्या संसाराच्या गाडीला सिद्धार्थच्या अमेरिकेच्या हट्टाने धक्का बसला आहे. गोड गुलाबी संसाराच्या स्वप्नांमध्ये रमलेल्या अदितीला सिद्धार्थ खोटेपणाचा आधार घेऊन अमेरिकेला घेऊन जाण्याची स्वप्न रंगवतो. एकीकडे अदिती हनीमूनला जाण्याची तयारी करते आहे तर सिद्धू अमेरिकेल्या जाण्याची. रविवारच्या विशेष भागात सिद्धार्थचा खोटेपणा अदितीसमोर येणार आहे. सिद्धार्थच्या खोटेपणाने दुखावलेली अदिती सिद्धार्थसोबत अमेरिकेला जाणार की कुटुंबाची साथ देणार? अदिती समोरचा हा पेच तिला कुठे घेऊन जाणार हे पाहाणं निश्चितच रंजक ठरणार आहे.

संबंधित बातम्या 

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha