Mauni Roy Suraj Nambiar: अभिनेत्री मौनी रॉय आणि तिचा पती सुरज नांबीयार वेगळे झाल्याची घोषणा केल्यानंतर सोशल मीडियावर अनेक चर्चांना उधाण आले आहे. लग्नाच्या चार वर्षानंतर घटस्फोट घेतल्यानंतर सोशल मीडियावर अनेक चर्चा रंगू लागल्या आहेत. मौनीने सूरजकडे मोठी पोटगी मागितल्याचा दावा करण्यात आला. सुरज आणि मौनी यांचं नातं तुटण्याचं कारण कोणी तिसरी व्यक्ती आहे असेही बोललं गेलं. या सगळ्या चर्चांमध्ये मात्र आता सूरजने स्वतः सोशल मीडियावर पोस्ट शेअर करत या सर्व अफवांना पूर्णविराम दिला आहे.
सुरज नांबीयारनं सगळ्या प्रकारावर मौन सोडलं ..
सूरजने इन्स्टाग्रामवर लिहिले, “मी एक गोष्ट स्पष्ट करू इच्छितो, कोणतीही पोटगी मागण्यात आलेली नाही. आमच्यात कोणताही वाद नाही आणि आमच्या नात्यात कोणतीही तिसरी व्यक्ती आलेली नाही. मौनी आणि मी परस्परांच्या भल्याचा विचार करून वेगळं होण्याचा निर्णय घेतला आहे. हाच एकमेव सत्य आहे. याशिवाय जे काही बोललं जात आहे, ते फक्त आमची बदनामी करण्याचा प्रयत्न आहे.”
पुढे त्याने लिहिले, “मी पुन्हा सांगतो, आमच्या दोघांबद्दल किंवा कोणत्याही तिसऱ्या व्यक्तीबद्दल केलेल्या दाव्यांमध्ये अजिबात तथ्य नाही. या प्रकरणात निरपराध मित्रांनाही ओढलं जात आहे, जे पूर्णपणे चुकीचं आहे. या संपूर्ण काळात मौनी आणि मी आमचा सन्मान कायम ठेवला आहे आणि माध्यमांनीही बातम्या देताना त्याच संवेदनशीलतेने वागावं, अशी अपेक्षा आहे.”
आम्हाला शांततेत जगू द्या..
माध्यमांवर नाराजी व्यक्त करत सूरज म्हणाला, “काही मीडिया हाऊसेसनी कोणताही पुरावा नसताना काल्पनिक कथा तयार केल्या. तथ्य पडताळणी न करता अशा बातम्या प्रकाशित केल्या जात आहेत. मुद्दाम पसरवल्या जाणाऱ्या चुकीच्या माहितीवर शांत बसणं मला मान्य नाही. आम्ही आमच्या निवेदनात आवश्यक ते सर्व सांगितले आहे. कृपया अफवा पसरवू नका आणि आम्हाला शांततेत जगू द्या.”
विभक्त होण्याची घोषणा
यापूर्वी 14 मे रोजी मौनी आणि सूरज यांनी संयुक्त निवेदन जारी करत विभक्त होण्याची घोषणा केली होती. त्यांनी म्हटलं होतं की, “आमच्या खासगी आयुष्यात होणाऱ्या अनावश्यक हस्तक्षेपामुळे आम्ही दुखावलो आहोत. आम्ही परस्पर संमतीने वेगळं होण्याचा निर्णय घेतला असून हे प्रकरण सन्मानपूर्वक हाताळण्यासाठी वेळ घेत आहोत.”
मौनी रॉय आणि सूरज नांबियार यांची पहिली भेट 2018 मध्ये दुबईमध्ये नववर्षाच्या सेलिब्रेशनदरम्यान झाली होती. काही वर्षे एकमेकांना डेट केल्यानंतर दोघांनी जानेवारी 2022 मध्ये लग्न केले होते. मात्र लग्नाच्या चार वर्षांनंतर आता त्यांनी वेगळं होण्याचा निर्णय घेतला आहे.
संबंधित वृत्त: