Sarsenapati Hambirrao Movie : ‘महाराजांचं स्वराज्य अठरा पगड जातीजमातींनी मिळून उभं केलं.. हिंदवी स्वराज्यासाठी जो मरणासमोर हटून उभा राहिला तो मरहट्टा.. वीर मराठा..’ अशी गर्जना ऐकून आली आणि प्रेक्षकांमध्ये ‘सरसेनापती हंबीरराव’ (Sarsenapati Hambirrao) या ऐतिहासिक चित्रपटाबद्दलची उत्सुकता वाढली होती. नुकताच हा चित्रपट प्रेक्षकांच्या भेटीला आला आहे. लेखक-दिग्दर्शक प्रविण तरडे (Pravin Tarde) यांनी या चित्रपटात ‘सरसेनापती हंबीरराव मोहिते’ यांची भूमिका साकारली आहे. या चित्रपट बॉक्स ऑफिसवर देखील धुमाकूळ घातला आहे.
'सरसेनापती हंबीरराव' हा चित्रपट बॉक्स ऑफिसवर चांगलीच कमाई करत आहे. इतिहासाचं सुवर्ण पान उलगडणारा हा चित्रपट प्रेक्षकांच्या पसंतीस उतरत आहे. आतापर्यंत या चित्रपटाने 18.20 कोटींची कमाई केली आहे. प्रविण तरडेंनी सोशल मीडियावर पोस्ट शेअर करत यासंदर्भात माहिती दिली आहे. प्रविण तरडेंनी पोस्ट लिहित म्हटले, ‘अजुनही सरसेनापती चित्रपटगृहात पाय रोवून उभे आहेत .. भेटला नसाल तर भेटून या ईतिहास तुमची वाट पहातोय. ज्यांनी सहकुटुंब सिनेमा चित्रपटगृहात जावून पाहीलाय हे दैदिप्यमान यश त्यांना समर्पित!’
प्रेक्षकांचा उदंड प्रतिसाद
‘सरसेनापती हंबीरराव’ या चित्रपटात स्वतः प्रविण तरडे यांनी हंबीररावांची भूमिका साकारली आहे. तर, अभिनेता गश्मीर महाजनी याने ‘छत्रपती शिवाजी महाराज’ आणि ‘छत्रपती संभाजी महाराज’ अशी दुहेरी भूमिका साकारली आहे. अभिनेत्री श्रुती मराठेने साकारलेली ‘महाराणी सोयराबाईं’ची भूमिकाही प्रेक्षकांच्या पसंतीस उतरली आहे. प्रेक्षक हा चित्रपट पाहण्यासाठी थिएटरमध्ये गर्दी करत आहेत. तर, काही चित्रपटगृहांबाहेर हाऊसफुल्लचे बोर्ड लागले आहेत.
अनेक कलाकारदेखील हा चित्रपट आवर्जून बघत असून, त्यावर आपल्या प्रतिक्रिया देत आहेत. प्रविण विठ्ठल तरडे यांची कथा, पटकथा, संवाद आणि दिग्दर्शन असलेला ‘सरसेनापती हंबीरराव’ हा चित्रपट सध्या सोशल मीडियावर धुमाकूळ घालत आहे. तीन दिवसांत या चित्रपटाने बॉक्स ऑफिसवर चांगलीच कमाई केली आहे.
संबंधित बातम्या :