Nilu Phule Biopic : मनोरंजन विश्वात सध्या बायोपिकचा ट्रेंड जोरात सुरू आहे. राजकारण, क्रीडा अशा क्षेत्रांतील अनेक दिग्गजांवर बायोपिक बनवले जात आहेत. याशिवाय चित्रपट कलाकारांचेही बायोपिक सध्या बनवले जात आहेत. या यादीत आणखी एका चित्रपट व्यक्तिमत्त्वाचे नाव जोडले गेले आहे आणि ते म्हणजे मराठी चित्रपटसृष्टीतील दिग्गज अभिनेते निळू फुले (Nilu Phule). आता प्रख्यात अभिनेते निळू फुलेंच्या जीवनावर आधारित बायोपिक लवकरच प्रेक्षकांच्या भेटीला येणार आहे.
मराठीच नव्हे तर आपल्या दमदार अभिनयाने हिंदी चित्रपटसृष्टीही काबीज करणारे दिवंगत अभिनेते निळू फुले (Nilu Phule Biopic) यांचा बयोपिक प्रेक्षकांच्या भेटीस येणार आहे. या चित्रपटाची निर्मिती टिप्स कंपनी करणार आहे. निळू फुले यांच्या जीवनावर आधारित या चित्रपटाची कथा किरण यज्ञोपवीत यांनी लिहिली आहे. तर, अभिनेता-निर्माता-दिग्दर्शक प्रसाद ओक (Prasad Oak) या चित्रपटाचे दिग्दर्शन करणार आहे. पुढच्या वर्षी म्हणजेच 2023मध्ये हा चित्रपट प्रदर्शित करण्याची तयारी सुरु झाली आहे..या चित्रपटात निळू फुले यांची भूमिका साकारण्यासाठी कलाकाराचा शोध सुरु झाला आहे.
चित्रपटाची घोषणा!
टिप्स कंपनीच्या तौरानी यांनी या चित्रपटाची घोषणा केली आहे. रमेश यांची टिप्स कंपनी हा चित्रपट बनवणार आहे. तौरानी यांनी निळू फुले यांची मुलगी गार्गी फुले यांच्याकडून चित्रपट बनवण्याचे अधिकार घेतले आहेत. लवकरच या चित्रपटाचे काम सुरू होणार आहे.
हा फक्त एक चित्रपट नसेल तर मी तुम्हाला दिलेली "गुरुदक्षिणा" असेल..!
निळू फुले यांच्या वाढदिवसानिमित्ताने प्रसाद ओक यानेही या चित्रपटाची घोषणा केली होती. यावेळी त्याने एक भावनिक पोस्ट देखील लिहिली होती. प्रसाद ओकने गेल्या वर्षी या चित्रपटाची घोषणा केली होती. आपल्या पोस्टमध्ये त्याने लिहिले होते की, ‘निळूभाऊ...आज तुमचा वाढदिवस...तुमच्या सहवासातली ती दोन अडीच वर्ष माझ्या आयुष्यातली सर्वात अविस्मरणीय होती भाऊ. तुम्हाला खूप जवळून पाहता आलं...अनुभवता आलं... तुमच्याकडून बरंच काही शिकलो... तुम्हाला न सांगता तुम्हाला मनोमन "गुरु"च मानलं...तुमचा आशीर्वाद म्हणूनच की काय तुमच्यावरचा जीवनपट दिग्दर्शित करण्याची संधी मला मिळाली आहे. हि संधी मला @tips.marathiनी दिली त्याबद्दल @tipsचे, @tips.marathi चे आणि @kumartaurani यांचे मनःपूर्वक आभार...!!! हा फक्त एक चित्रपट नसेल तर मी तुम्हाला दिलेली "गुरुदक्षिणा" असेल...!!! फक्त पाठीवर तुमचा हात कायम राहू द्या भाऊ...!!!’
हेही वाचा :
50 Years Of Pinjara : मराठी चित्रपटसृष्टीतील मैलाचा दगड, ‘पिंजरा’ने गाठली पन्नासी!