मुंबई : स्टार प्रवाहवर लवकरच सुरु होणाऱ्या ‘सुख म्हणजे नक्की काय असतं’ या मालिकेचा मुहूर्त नुकताच संपन्न झाला. निर्माता दिग्दर्शक महेश कोठारे यांच्या कोठारे व्हिजन्सने या मालिकेची निर्मिती केली असून या नव्या मालिकेसाठी स्टार प्रवाह आणि कोठारे व्हिजन्सची संपूर्ण टीम सज्ज झाली आहे. मुहूर्ताच्या या खास प्रसंगी कलाकारांसोबतच सेटवर महेश कोठारे, आदिनाथ कोठारे आणि उर्मिला कोठारे उपस्थित होते. देवीचा आशिर्वाद घेऊन आणि सरकारी सुचनांचं पूर्णपणे पालन करत शूटिंगचा श्रीगणेशा करण्यात आला.
नव्यानं सुरु होणाऱ्या या मालिकेत अभिनेत्री गिरीजा प्रभू आणि अभिनेता मंदार जाधव मुख्य भूमिका साकारणार आहेत. गिरीजानं यापूर्वी डॅड चीअर्स, काय झालं कळना सारख्या चित्रपटांमध्ये भूमिका साकारली आहे.. सुख म्हणजे नक्की काय असतं या मालिकेत गिरीजानं साकारलेल्या भूमिकेचं नाव गौरी शिंदे असं आहे. भूमिकेबद्दल बोलताना गिरीजा म्हणाली, 'खूप मोठी जबाबदारी आहे. आमचे दिग्दर्शक चंद्रकांत पाटील यांच्याकडून खूप गोष्टी शिकायला मिळत आहेत. प्रमुख भूमिका असलेली ही पहिलीच मालिका असल्यामुळे खूप उत्सुकता आहे'.
तर अभिनेता मंदार जाधव स्टार प्रवाहवरील श्री गुरुदेव दत्त मालिकेत श्री दत्तांची भूमिका साकारताना आपल्याला दिसला होता.. 'सुख म्हणजे..' या मालिकेत तो जयदिप यशवंत शिर्के पाटील ही भूमिका साकारतोय. श्री गुरुदेव दत्त मालिकेतल्या मंदारच्या लूकचं खूपच कौतुक झालं होतं. सुख म्हणजे नक्की काय असतं मालिकेतील त्याचा लूकही लक्षवेधी असणार आहे. सुख म्हणजे नक्की काय असतं मालिकेतल्या भूमिकेविषयी सांगताना मंदार म्हणाला, श्री गुरुदेव दत्त नंतर पुन्हा एकदा स्टार प्रवाहची मालिका करतोय याचा प्रचंड आनंद आहे. कोल्हापूरात घडणारी ही गोष्ट आहे. जयदीप असं माझ्या व्यक्तिरेखेचं नाव असून तो परदेशात शिकलेला मुलगा आहे. जयदीप अन्यायाविरोधात नेहमी उभा ठाकतो आणि हेच त्याचं वेगळेपण आहे. आदर्श मुलगा, आदर्श भाऊ, आदर्श जावई याचं उत्तम उदाहरण म्हणून जयदीप या पात्राचा उल्लेख करता येईल. श्री दत्तांच्या रुपात प्रेक्षकांनी मला भरभरुन प्रेम दिलं त्यामुळे नव्या मालिकेतला माझा नवा अंदाजही प्रेक्षकांना आवडेल अशी आशा आहे.
गेल्या आठवड्यात स्टार प्रवाह वाहिनीचा टिआरपी सगळ्यात जास्त होता. त्यामुळे याच आठवड्यात त्यांनी त्यांच्या या नव्या मालिकेची घोषणा केली आहे. आता मालिकांचं शूटिंग पुन्हा सुरु झाल्याचा आणि येणाऱ्या या नव्या मालिकेचा स्टार प्रवाह वाहिनीला असाच फायदा होतो का ते पहावं लागेल.
संबंधित बातम्या :