Prathyusha Garimella : टॉलिवूड इंडस्ट्रीतील प्रसिद्ध फॅशन डिझायनर प्रत्युषा गारिमेला (Prathyusha Garimella) शनिवारी (11 जून) तिच्या तेलंगणातील बंजारा हिल्स येथील अपार्टमेंटमध्ये मृतावस्थेत आढळून आली आहे. पोलीस या प्रकरणाचा अधिक तपास करत आहेत. मिळालेल्या माहितीनुसार, 35 वर्षीय फॅशन डिझायनर प्रत्युषा गारिमेला ही बंजारा हिल्समध्ये राहत होती. शनिवारी दुपारी सुरक्षा तपासणीला तिच्याकडून प्रतिसाद न मिळाल्याने तिच्या सुरक्षा रक्षकांनी याबाबत पोलिसांना माहिती दिली. यानंतर पोलिसांनी दरवाजा तोडून घरात प्रवेश केला. तेव्हा, बाथरूममध्ये डिझायनर प्रत्युषाचा मृतदेह आढळून आला.
पोलीस घटनास्थळी पोहोचून तपास करत असताना, त्यांना तिच्या खोलीतून कार्बन मोनॉक्साईडची बाटली सापडली. त्यामुळे प्रत्युषाने कार्बन मोनॉक्साईडचा वापर करून आपलं आयुष्य संपवल्याचा अंदाज वर्तवला जात आहे. पोलिसांनी दिलेल्या माहितीनुसार, प्रत्युषाच्या बाथरूममध्ये कोळसा होता, याद्वारेच कदाचित तिने वाफ घेतली होती. तिने आत्महत्या केली, असा प्राथमिक अंदाज वर्तवला जात आहे. शवविच्छेदन अहवाल आल्यानंतरच नेमकं कारण स्पष्ट होईल, असे पोलिसांचे म्हणणे आहे. तत्पूर्वी पोलिसांनी संशयास्पद मृत्यूची नोंद केली आहे. तिच्या मृत्यूची माहिती कुटुंबीयांना देण्यात आली आहे.
डिप्रेशनशी संघर्ष
प्रत्युषा गेल्या काही काळापासून डिप्रेशनमध्ये होती. तिच्यावर उपचारही सुरू असल्याचेही बोलले जात आहे. मात्र, याबाबत अद्याप कोणतीही ठोस माहिती मिळालेली नाही. पोलीस या प्रकरणाचा अधिक तपास करत आहेत. तिचा मृतदेह शवविच्छेदनासाठी उस्मानिया रुग्णालयात पाठवण्यात आला आहे. तिने आत्महत्या केली आहे का, या दृष्टिकोनातूनही पोलीस तपास करत आहेत. पोलिसांना तपासात एक सुसाईड नोट देखील सापडली आहे. यात लिहिले होते की, प्रत्युषा आयुष्यात खूप एकटी झाली होती, त्यामुळे तिने आत्महत्या केली आहे आणि त्यासाठी ती कोणाला दोषी मानत नाही. मात्र, हे प्रकरण खरंच आत्महत्येचे आहे का?, याचा तपास पोलीस करत आहेत.
प्रत्युषाचा स्वतःचा फॅशन लेबल आहे. 'प्रत्युषा गारिमेला' या नावाने कपड्यांचा ब्रँड ती चालवत होती. तिचे फ्लॅगशिप स्टोअर हैदराबाद, मुंबई येथे आहे. याशिवाय डिझायनर इन्स्टाग्रामच्या माध्यमातूनही तिच्या कपड्यांचे प्रमोशन करायची. मात्र, तिच्या अचानक मृत्यूने फॅशन इंडस्ट्रीतील अनेकांना धक्का बसला आहे.
हेही वाचा :
Bidisha De : अभिनेत्री बिदिशा डेचं निधन; गळफास घेत केली आत्महत्या
Sangeetha Sajith : दाक्षिणात्य गायिका संगीता साजिथ यांचं निधन, दिग्गजांनी केला शोक व्यक्त
Chethana Raj : कन्नड अभिनेत्री चेतना राजचे निधन; खाजगी रुग्णालयात सर्जरी केल्यानंतर मृत्यू