Irina Rudakova : बिग बॉसच्या घरात धनंजय (Dhananjay Powar) आणि परदेसी गर्ल इरिना रुडाकोव्हा (Irina Rudakova) यांच्यात एक खूप छान नातं तयार झाल्याचं पाहायला मिळालं. इतकच नव्हे तर धनंजय बिग बॉसच्या घरात अगदी पहिल्या दिवसांपासूनच इरिनाला कोल्हापुरी भाषा शिकवत होता. पण अगदी काहीच दिवसांत इरिना घरातून बाहेर पडली. त्यामुळे तिची बिग बॉसच्या घरात कोल्हापुरी शिकण्याची शाळा अर्धीच राहिली. पण आता बिग बॉसच्या घरातून बाहेर आल्यानंतर इरिनाची शाळा पुन्हा सुरु झालीये.
इरिना नुकतीच धनंजयच्या घरी कोल्हापुरात गेली. त्यावेळी तिचं जंगी स्वागत करण्यात आलं. तसेच यावेळी तिने आणि धनंजयने स्पेशल कोल्हापुरीत संवाद साधला. यावर अनेकांनी कमेंट्स करत इरिनाचं कोल्हापुरात स्वागत केलंय. त्याचप्रमाणे त्यांच्या या व्हिडीओवर चाहत्यांनी कमेंट्स केल्याचं पाहायला मिळतंय.
धनंजयने शेअर केला व्हिडीओ
धनंजयने शेअर केलेल्या व्हिडीओमध्ये धनंजयच्या पत्नीने आणि आईने औक्षण करुन इरिनाचं स्वागत केलं. तसेच धनंजयसोबत इरीने कोल्हापूरकरांनाही नमस्कार केला. नमस्कार कोल्हापूरकर असं म्हणत महालक्ष्मीच्या नावानेही चांगलभलं इरिनाने म्हटलं आहे. पुढे इरीने संपला की विषय, सुपला शॉट असे काही खास शब्दही म्हटलं आहे.
चाहत्यांकडून कमेंट्सचा वर्षाव
धनंजयच्या या व्हिडीओवर एकाने कमेंट करत म्हटलं की,मराठी संस्कृती... आणखी एका युजरने कमेंट करत म्हटलं की,मला अभिमान वाटतो तुम्ही मराठी भाषा बोलता. एका युजरने कमेंट करत म्हटलं की, जगात भारी आम्ही कोल्हापुरी... दुसऱ्या एका युजरने कमेंट करत म्हटलं की,इरिना खूप छान मराठी संस्कृती जपते.