Hetal Yadav : छोट्या पडद्यावरील लोकप्रिय अभिनेत्री हेतल यादवचा (Hetal Yadav) अपघात झाला आहे. सध्या ती छोट्या पडद्यावरील 'इमली' (Imlie) या लोकप्रिय मालिकेत शिवानी राणा हे पात्र साकारत आहे. हेतल रविवारी रात्री शूटिंगवरून घरी परतत असताना तिच्या कारला ट्रकने धडक दिली.
रिपोर्टनुसार, रविवारी रात्री हेतल शूटिंग संपवून घरी परतत असताना तिच्या कारला ट्रकने धडक दिल्याने तिचा अपघात झाला आहे. हेतल स्वत: ड्राईव्ह करत असताना हा अपघात झाला आहे. हेतलचा अपघात झाल्याने तिच्या चाहत्यांना मोठा धक्का बसला आहे.
अपघातानंतर हेतल म्हणाली,"रविवारी रात्री 8.45 च्या सुमारास पॅकअप झाल्यावर मी फिल्मसिटीहून निघाली होती. जेव्हीएलआर हायवेवर पोहोचताच एका ट्रकने माझ्या कारला मागून धडक दिली. अपघातानंतर लगेचच मी माझ्या मुलाला फोन केला. अपघातासंदर्भात मुलाने पोलिसांना माहिती दिली. अपघातानंतर मलाही मोठा धक्का बसला होता".
अपघातात हेतलला कोणत्याही प्रकारची गंभीर दुखापत झालेली नाही. अपघातातून वाचल्याबद्दल तिने देवाचे आभार मानले आहेत. सध्या हेतल शिवानी राणाच्या माध्यमातून प्रेक्षकांच्या भेटीला येत आहे. अपघाताच्या दुसऱ्या दिवशी हेतलने शूटिंगलादेखील सुरुवात केली आहे.
हेतल म्हणाली,"अपघातात मला इजा झालेली नाही. मालिकेत एका महत्त्वाच्या सीक्वेन्सचे शूटिंग करायचे होते. त्यामुळे मला अपघाताच्या दुसऱ्याच दिवशी सेटवर जावे लागले आहे. तसेच माझ्यामुळे शूटिंग थांबू नये, असे मला वाटत असल्याने मीदेखील सकाळी लवकर सेटवर पोहोचली.
हेतल छोट्या पडद्यावरील लोकप्रिय अभिनेत्री आहे. तिने छोट्या पडद्यावरील 'तारक मेहता का उल्टा चष्मा' या लोकप्रिय मालिकेतदेखील काम केलं आहे. या मालिकेत तिने ज्वाला ही भूमिका साकारली होती. हेतल अपघातात जखमी झालेली नसल्याने तिच्या चाहत्यांना दिलासा मिळाला आहे. ती लवकरात-लवकर या धक्क्यातून बाहेर यावी यासाठी चाहते प्रार्थना करत आहेत.
संबंधित बातम्या