Swapnil Joshi Birthday : मराठी मनोरंजनसृष्टीतील 'चॉकलेट बॉय' स्वप्नील जोशीने (Swapnil Joshi) बालपणीच मनोरंजनविश्वात पदार्पण केलं. आपल्या उत्कृष्ट अभिनयाने प्रेक्षकांना भुरळ घालण्यासोबत त्याने मराठी-हिंदी मालिका, सिनेमे आणि वेबसीरिज अशा सर्वच माध्यमांत काम केलं आहे. विनोदी अभिनेता म्हणून लोकप्रिय असलेल्या 'चॉकलेट बॉय' स्वप्नील जोशीचा आज वाढदिवस आहे.
रामानंद सागर यांच्या सुपरहिट ठरलेल्या 'श्री कृष्णा' या मालिकेत स्वप्नीलने साकारलेली कृष्णाची भूमिका प्रचंड गाजली. या मालिकेमुळे स्वप्नील घराघरांत पोहोचला. त्यानंतर त्याने वयाच्या नवव्या वर्षी 'रामायण' या मालिकेत काम केलं. 'रामायण' मालिकेत स्वप्नील रामचा मुलगा कुशच्या भूमिकेत दिसून आला होता.
स्वप्नीलला कलेची आवड कशी निर्माण झाली?
स्वप्नीलचं बालपण चाळीत गेलं आहे. लहानपणी चाळीत होत असलेल्या गणेशोत्सव, नवरात्रोत्सवाच्या कार्यक्रमांमध्ये स्वप्नील सहभागी व्हायचा. तसेच शाळेतील नाटकांतदेखील तो भाग घेत असे. बालपणी आसपास सांस्कृतिक वातावरण असल्याने स्वप्नीलला कलेची आवड निर्माण झाली.
स्वप्नील जोशी हा मराठी सिनेसृष्टीतील आघाडीचा अभिनेता आहे. त्याने त्याच्या करिअरमध्ये विविधांगी भूमिका साकारल्या आहेत. स्वप्नीचे 'दुनियादारी', 'मुंबई-पुणे-मुंबई', पक पक पकाक, व्हेंटिलेटर, शाळा असे अनेक सिनेमे सुपरहिट ठरले आहेत. तर 'श्रीकृष्ण', 'रामायण', 'एका लग्नाची दुसरी गोष्ट' अशा लोकप्रिय मालिकांमध्ये स्वप्नीलने काम केलं आहे. सध्या 'तू तेव्हा तशी' या मालिकेच्या माध्यमातून स्वप्नील प्रेक्षकांच्या भेटीला येत आहे.
स्वप्नीने जोशीची दोन लग्न झाली आहेत. त्याचं पहिलं लग्न फार काळ टिकू शकलं नाही. अकरावीत असताना तो वर्गातल्या अपर्णा नावाच्या मुलीच्या प्रेमात पडला. त्यानंतर त्यांनी लग्नही केलं. पण त्याचं नातं फार काळ टिकलं नाही. लग्नाच्या चार वर्षांनंतर 2009 साली स्वप्नील आणि अपर्णा विभक्त झाले. त्यानंतर 2011 साली स्वप्नीलने औरंगाबादच्या लीनासोबत दुसरं लग्न केलं. स्वप्नीलला मायरा आणि राघव अशी दोन मुलं आहेत.
स्वप्नीने जोशीची सध्या मालिका सुरू असली तरी त्याचे अनेक सिनेमे पाईपलाईनमध्ये आहेत. सचिन पिळगावकर हे स्वप्नील जोशीचे आदर्श आहेत. चॉकलेट बॉय लवकरच 'सिटी ऑफ ड्रीम्स' या बहुचर्चित वेबसीरिजमध्ये झळकणार आहे. 'सिटी ऑफ ड्रीम्स'चा पुढचा भाग प्रेक्षकांच्या भेटीला येणार असून यात स्वप्नील गृहमंत्र्याच्या भूमिकेत दिसून शकतो.
संबंधित बातम्या