Avdhoot Gupte : मराठमोळा गायक अवधूत गुप्तेच्या (Avdhoot Gupte) गाण्यावर प्रेक्षक मनमुरादपणे थिरकताना दिसतात. अवधूतची बरीच गाणी ही प्रेक्षकांच्या पंसतीस उतरलेली आहेत. त्यामुळे मराठी कलाविश्वातही अवधूत गुप्तेच्या नावाला बरीच पसंती मिळते. पण सध्या अवधूतंच नाव एका वेगळ्या गोष्टीमुळे चर्चेत आहे. अवधूतने नुकतच मुंबई त्याचं नवं आलिशान घराची खरेदी केली आहे.
SquareYards ने दिलेल्या माहितीनुसार, त्याचप्रमाणे हिंदुस्थान टाईमच्या वृत्तानुसार, अवधूतने खार पश्चिम येथे त्याचं हे आलिशान घर घेतलं आहे. या घराची किंमत तब्बल 7 कोटी 75 लाख रुपये आहे. अवधूत आणि त्याची पत्नी गिरिजा या दोघांनी मिळून ही आलिशान खरेदी केली आहे. तसेच त्याचं हे घर खारमधील रुस्तमजी पॅरामाउंट असून 16 व्या मजल्यावर हे घर आहे. दरम्यान याच परिसरामध्ये बॉलिवूडच्या अनेक मोठ्या सेलिब्रेटींची घरं आहे.
दीपिका आणि रणबीरचा शेजारी होणार अवधूत?
अहवालानुसार, अवधूतने त्याच्या घराचा संपूर्ण व्यवहार हा 16 ऑक्टोबर रोजी पूर्ण केल्याचं सांगण्यात येत आहे. त्याचप्रमाणे या घरासाठी त्याने स्टॅम्पड्युटी म्हणून 46 लाख 48 हजार रुपये भरले असल्याची माहिती सध्या समोर आलेली आहे. अवधूतने ज्या परिसरामध्ये घर घेतलं आहे, त्याच परिसरामध्ये दीपिका पादुकोण, सलमान खान, रणबीर कपूर, आमिर खान, क्रिकेटपटू के.एल. राहुल आणि त्याची पत्नी अथिया शेट्टी यांचीही घरं आहेत.
अवधूत गुप्तेबद्दल जाणून घ्या...
'खुप्ते तिथे गुप्ते' या कार्यक्रमाच्या माध्यमातून अवधूत गुप्ते सध्या प्रेक्षकांचं मनोरंजन करत आहे. गायक, संगीतकार, सिने-निर्माता आणि दिग्दर्शक म्हणून तो लोकप्रिय आहे. मराठी आणि हिंदीतील अनेक गाण्यांचं त्याने पार्श्वगायन केलं आहे. तसेच अनेक लोकप्रिय संगीत अल्बमला त्यांनी संगीत दिलं आहे. मराठी सिनेमांची निर्मिती आणि दिग्दर्शनही त्यांनी केलं आहे. अवधूतचं 'ऐका दाजीबा' हा इंडिपॉप अल्बम चांगलाच गाजला. त्यानंतर त्याने 'झेंडा' या सिनेमाची निर्मिती केली. हा सिनेमाही सुपरहिट झाला.