Anant-Radhika Pre Wedding: गुजरातमधील जामनगरमध्ये सध्या एकाच गोष्टीची चर्चा आहे, ती म्हणजे अनंत अंबानी (Anant Ambani) आणि राधिका मर्चंट (Radhika Marchant) यांच्या प्री वेडिंग सोहळ्याची. या सोहळ्यासाठी बॉलीवूड, हॉलीवूडसह अनेक दिग्गजांची उपस्थिती आहे. या सोहळ्यातील अनेक व्हिडिओज् सध्या सोशल मीडियावर व्हायरल होत आहेत. असाच एक व्हिडिओ सध्या सोशल मीडियावर सगळ्यांचं लक्ष वेधून घेतोय. अनंत अंबानी यांनी या सोहळ्यासाठी त्यांच्या कुटुंबियांचे आभार मानले. त्यावेळी त्यांचे वडिल मुकेश अंबानी (Mukesh Ambani) यांच्या डोळ्यात आपसुकच पाणी आलं.
या सोहळ्यासाठी घरातील प्रत्येकाने घेतलेल्या मेहनतीसाठी अनंत अंबानी यांनी त्यांच्या कुटुंबियांचे आभार मानले आहेत. तसेच त्यांनी या सोहळ्यासाठी आलेल्या प्रत्येकाचे देखील स्वागत केले असून त्यांच्या उपस्थितीसाठी त्यांचे आभार मानलेत. या सोहळ्यासाठी मागील चार महिन्यांत घरातील प्रत्येक व्यक्तीने फार मेहनत घेतलीये, असं म्हणत मर्चंट आणि अंबानी अशा दोन्ही कुटुंबियांचा उल्लेख यावेळी अनंतर अंबानी यांनी केला.
अनंत अंबानी यांनी नेमकं काय म्हटलं?
आजचा हा सोहळा माझ्या आईमुळे होतोय. मागील चार महिन्यात ती दिवसभरातले जवळपास 17 ते 18 तास काम करत होती. हा सोहळा आनंदाने साजरा करण्यासाठी माझ्या घरातील प्रत्येक व्यक्तीने तितकीच मेहनत घेतलीये. हा आनंद तुम्हा प्रत्येकासोबत साजरा करण्यातच आम्हाला खरा आनंद मिळतोय, असं अनंत अंबानी यांनी म्हटलं.
मुकेश अंबानींचे डोळे पाणावले
यावेळी बोलताना अनंत अंबानी यांनी म्हटलं की, माझं सुरुवातीपासूनचं आयुष्य हे काही फुलासारखं नव्हतं. माझ्या आरोग्याशी संबंधित अनेक अडचणींचा सामना मी यावेळी केलाय. पण यामध्ये माझे आई वडिल माझ्या पाठिशी खंबीरपणे उभे होते. यावेळी मुकेश अंबानी यांच्या डोळ्यातही पाणी आलं. जामनगरमध्ये 1 ते 3 मार्च दरम्यान अनंत अंबानी आणि राधिका मर्चंट यांच्या प्री वेडिंग फंक्शनचा सोहळा आयोजित करण्यात आलाय.
जामनगरमध्ये सेलिब्रिटींची मांदियाळी
अनंत अंबानी आणि राधिका मर्चेंट यांच्या प्री-वेडिंगला अनेक सेलिब्रिटी हजेरी लावणार आहेत. यात अमिताभ बच्चन, रजनीकांत, शाहरुख खान, आमिर खान, सलमान खान, अक्षय कुमार, ट्विंकल खन्ना, अजय देवगन, काजोल, सैफ अली खान, रणवीर सिंह, दीपिका पादुकोण, अर्जुन कपूर, रणबीर कपूर, आलिया भट्ट, विकी कौशल, कतरिना कैफ, करण जोहर, वरुण धवन, सिद्धार्थ मल्होत्रा, श्रद्धा कपूर, करिश्मा कपूर, करीना कपूर, सैफ अली खानसह अनेकांचा समावेश आहे.