Abhishek Bachchan Video Viral : अभिषेक बच्चनचा 'घूमर' चित्रपट नुकताच प्रदर्शित झाला आहे. अनेक वर्षांनी अभिषेकने या चित्रपटाच्या निमित्ताने मोठ्या पडद्यावर आगमन केले आहे. बऱ्याच दिवसांपासून अभिषेकचे चित्रपट फक्त OTT प्लॅटफॉर्मवर प्रदर्शित होत होते. याआधी अभिषेकचे काही सिनेमे बॉक्स ऑफिसवर फ्लॉप ठरले आहेत. घूमरमध्ये अभिषेक बच्चन व्यतिरिक्त सैयामी खेर मुख्य भूमिकेत दिसली आहे. सध्या हे दोघेही प्रमोशन करण्यात मोठ्या प्रमाणात व्यस्त आहेत. या चित्रपटाचे प्रमोशन करण्याकरता हे दोघेही चला हवा येऊ द्या मध्ये हजेरी लावताना दिसणार आहे.
या प्रमोशनचा नुकताच व्हिडीओ समोर आला आहे. ज्यात अभिषेक मिसळवर ताव मारताना दिसत आहे. हा प्रोमो समोर येताच प्रचंड चर्चेत आला. याचं कारण म्हणजे यामध्ये अभिषेक बच्चन याने त्याचे वडील अमिताभ बच्चन मिसळ खातो की नाही याचा खुलासा केला आहे.
यावेळी अभिषेकने सांगितले की, मला मिसळ खूप आवडते. मी नेहमी मिसळ खात असतो. मग काय हे ऐकताच निलेश साबळे त्याला झणझणीत मिसळ आणून देतो. यावेळी बिग बी पण मिसळ खातात का असा प्रश्न जेव्हा निलेश साबळे विचारतो तेव्हा अभिषेक म्हणाला की, 'नाही, नाही सगळी मिसळ तोच खाऊन टाकतो त्यामुळे त्यांना काही उरतच नाही.' अभिषेक मिसळवर ताव मारतो आणि सैराटच्या झिंगाट गाण्यावर भन्नाट डान्सही करतो. या सोबतच लहानपणी तो दादा कोंडकेचे चित्रपट पाहायचा असाही खुलासा त्याने केला. सध्या हा व्हिडिओ व्हायरल होत आहे. हा मजेदार भाग 21 ऑगस्ट रोजी प्रसारित होईल.
अभिषेक बच्चनच्या 'घुमर' चित्रपटाबाबत जाणून घ्या
अभिषेक बच्चनचा बहुचर्चित 'घुमर' हा सिनेमा आज प्रेक्षकांच्या भेटीला आला आहे. महिला क्रिकेटर अनिनीच्या आयुष्यावर आधारित हा सिनेमा आहे. या सिनेमात अभिषेक बच्चन आणि सैयामी खेर (Saiyami Kher) मुख्य भूमिकेत आहेत. या सिनेमात अभिषेक क्रीडा प्रशिक्षकाच्या भूमिकेत दिसत आहे. आर. बाल्की यांनी या सिनेमाचं दिग्दर्शन केलं आहे. अभिषेक आणि सैयामीसह शिवेंद्र सिंह आणि इनवाका दासही या सिनेमात महत्त्वाच्या भूमिकेत आहेत. अमिताभ बच्चन यांनीही अभिषेकला खास पोस्ट शेअर करत 'घुमर'साठी शुभेच्छा दिल्या आहेत. अभिषेक बच्चनच्या 'घुमर' या सिनेमात अमिताभ बच्चन यांची देखील झलक पाहायला मिळणार आहे.