UP Assembly Elections 2022: उत्तर प्रदेश विधानसभा निवडणुकीच्या मतदानापूर्वी समाजवादी पक्षाचे प्रमुख आणि माजी मुख्यमंत्री मुलायम सिंह यांची धाकटी सून अपर्णा यादव यांनी आज भाजपमध्ये प्रवेश केला आहे. वहिनी अपर्णा यांनी भाजपमध्ये प्रवेश केल्यानंतर अखिलेश यादव यांनी प्रतिक्रीया दिली आहे. "सर्वप्रथम मी त्यांचे अभिनंदन करतो. मुलायमसिंह यादव यांनी अपर्णा यादव यांना समजवण्याचा खूप प्रयत्न केला, अशी प्रतिक्रीया अखिलेश यादव यांनी दिली आहे.
अपर्णा यादव यांनी भाजपमध्ये प्रवेश केल्यानंतर अखिलेश यादव यांनी पत्रकार परिषदेत या प्रवेशावर आपले मत मांडले. अखिलेश यादव म्हणाले, "अपर्णा यांनी भाजपमध्ये प्रवेश केल्याने आम्हाला आनंद झाला आहे. कारण समाजवादी विचारसरणीचा विस्तार होत आहे. मला आशा आहे की आमची विचारधारा तिथे पोहोचेल आणि संविधान आणि लोकशाही वाचवण्यासाठी त्या काम करतील.”
दरम्यान, अपर्णा यांच्या भाजप प्रवेशानंतर उत्तर प्रदेशचे मुख्यमंत्री योगी आदित्यानाथ यांनी ट्विटवरून आपली प्रतिक्रीया दिली आहे. "अपर्णा यादव यांचे भाजप परिवारात स्वागत आहे." असे ट्विट योगी आदित्यानाथ यांनी केले आहे.
अपर्णा यादव यांनी आज सकाळी उपमुख्यमंत्री केशव प्रसाद मौर्य यांच्या उपस्थितीत भाजपमध्ये प्रवेश केला. "मी पहिल्यापासूनच पंतप्रधान नरेंद्र मोदी यांच्या कामाने खूप प्रभावित झाले आहे, अशी प्रतिक्रीया अपर्णा यांनी भाजप प्रवेशानंतर दिली आहे.
येत्या 10 फेब्रुवारीपासून उत्तर प्रदेशातील 403 विधानसभा जागांसाठी सात टप्प्यांत मतदान सुरू होणार आहे. यूपीमध्ये 10, 14, 20, 23, 27 फेब्रुवारी आणि 3 व 7 मार्च रोजी अशा सात टप्प्यांत मतदान होणार आहे. तर 10 मार्च रोजी मतमोजणी होणार आहे.
महत्वाच्या बातम्या