Maharashtra Vidhan Sabha Election : सातारा : सातारा जिल्ह्यातील विधानसभेच्या आठ मतदारसघांपैकी सर्वाधिक उमेदवार ज्या मतदारसंघातून इच्छुक आहेत तो मतदारसंघ म्हणजे माण विधानसभा मतदारसंघ होय. माण विधानसभा मतदारसंघावर 2009 पूर्वी राष्ट्रवादीचे दिवंगत नेते सदाशिव तात्या पोळ यांचं वर्चस्व होतं. 2009 च्या विधानसभा निवडणुकीवेळी हा मतदारसंघ खुल्या प्रवर्गात आला, त्यापूर्वी तो एससी प्रवर्गासाठी राखीव होता. 2009 पासून जयकुमार गोरे या विधानसभा मतदारसंघाचे आमदार आहेत. यावेळी माण विधानसभा मतदारसंघातून निवडणूक लढवण्यासाठी अनेक जण इच्छुक आहेत.
जयकुमार गोरे तीन टर्म आमदार
सातारा जिल्ह्यात विधानसभेचे आठ मतदारसंघ आहेत. यामध्ये सातारा, पाटण, कराड उत्तर, कोरेगाव , कराड दक्षिण, वाई, फलटण आणि माण मतदारसंघांचा समावेश आहे. माण विधानसभा मतदारसंघात 2009 च्या विधानसभा निवडणुकीवेळी जयकुमार गोरे यांनी अपक्ष निवडणूक लढवली होती. काँग्रेस राष्ट्रवादीच्या जागा वाटपात ती जागा राष्ट्रवादीच्या वाट्याला गेला होता. विधानसभा निवडणुकीत विजयी झाल्यानंतर जयकुमार गोरे यांनी काँग्रेसला पाठिंबा दिला होता. 2014 ची विधानसभा निवडणूक सर्वच राजकीय पक्षांनी स्वतंत्रपणे लढवल्यानं काँग्रेसकडून जयकुमार गोरे आमदार झाले होते. 2014 ते 2019 ही टर्म संपण्यापूर्वीच जयकुमार गोरे यांनी राजीनामा देत भाजपमध्ये प्रवेश केला. भाजपच्या चिन्हावर 2019 ची विधानसभा निवडणूक जयकुमार गोरे यांनी लढवली आणि ते विजयी झाले.
2019 ला निसटता विजय
माण विधानसभा मतदारसंघात 2019 च्या निवडणुकीवेळी तिरंगी लढत झाली. भाजपकडून जयकुमार गोरे, शिवसेनेकडून शेखर गोरे, राष्ट्रवादी काँग्रेसकडून प्रभाकर देशमुख उमेदवार होते. माण मतदारसंघातील या निवडणुकीत जयुकमार गोरे यांना 91469 मतं मिळाली. प्रभाकर देशमुख यांना 88426 मतं मिळाली. तर, शेखर गोरे यांना 37539 मतं मिळाली. जयकुमार गोरे यांना त्यावेळी तिरंगी लढतीचा फायदा झाला.
माण विधानसभा मतदारसंघात जोरदार स्पर्धा
माण विधानसभा मतदारसंघात भाजपकडून जयकुमार गोरे यांना उमेदवारी मिळणार हे निश्चित आहे. सिटींग गेटिंग या सूत्राप्रमाण ही जागा भाजपच्या वाट्याला जाणार आहे. दुसरीकडे महाविकास आघाडीत या जागेवरुन निवडणूक लढवण्यासाठी अनेक जण इच्छुक आहेत. यामध्ये प्रभाकर देशमुख, अनिल देसाई आणि अभयसिंह जगताप यांच्याकडून उमेदवारीसाठी मोर्चेबांधणी सुरु आहे. तर, दुसरीकडे जयकुमार गोरे यांचे बंधू शेखर गोरे सध्या ठाकरे यांच्या शिवसेनेत आहेत. शेखर गोरे यांनी गेल्यावेळी निवडणूक लढवली होती. यावेळी ते निवडणूक लढवणार की नाही याबद्दल चित्र अद्याप स्पष्ट झालेलं नाही. महाविकास आघाडीत ही जागा राष्ट्रवादी काँग्रेस पार्टी शरदचंद्र पवार पक्षाकडे आहे. सातारा जिल्ह्यातील सर्वाधिक रंगतदार लढत माण विधानसभा मतदारसंघात होणारहे नक्की आहे.
दरम्यान, लोकसभा निवडणुकीत हा माण मतदारसंघ माढा लोकसभा मतदारसंघात येतो. या मतदारसंघातून भाजपच्या रणजितसिंह निंबाळकर यांना आघाडी मिळाली होती.
इतर बातम्या :