Lok Sabha Election 2024 AAP Seats Opinion Poll: 2024 च्या लोकसभा निवडणुकीत (Lok Sabha Election 2024) कोणत्या पक्षाला किती जागा मिळतील? यावर आतापर्यंत अनेक सर्वेक्षणं झाली आहेत. तसेच, त्यांचे निष्कर्षही समोर आले आहेत. एकूणच भाजपच्या एनडीए (NDA) आघाडीला इंडिया (I. N. D. I. A) अलायन्सपेक्षा जास्त जागा मिळण्याचा अंदाज जवळपास सर्वच सर्वेक्षणांमधून वर्तवण्यात आला आहे. विरोधी पक्षांच्या इंडिया आघाडीत अरविंद केजरीवाल यांच्या पक्षाचाही समावेश आहे. या सर्वेक्षणांमध्ये आम आदमी पक्षानं मिळवलेल्या जागांनी सर्वांनाच आश्चर्याचा धक्का दिला आहे. एकंदरीत विरोधकांच्या इंडिया आघाडीच्या साथीनं आगामी लोकसभा निवडणुकीच्या रिंगणात उतरणं आपसाठी फायद्याचं की, तोट्याचं? सर्वेक्षणाच्या निष्कर्षानुसार जाणून घेऊयात...  


पुढील वर्षी होणाऱ्या सार्वत्रिक निवडणुकीसाठी दोन आघाड्या आमनेसामने आहेत. इंडिया आघाडीत विरोधी एकजूट कायम राहिल्यास 2024 मध्ये सत्ताधाऱ्यांची एनडीए आणि विरोधकांच्या इंडियामझ्ये मोठी लढत पाहायला मिळू शकते. 2019 मध्ये AAP नं लोकसभेची फक्त एक जागा जिंकली होती, पण आगामी लोकसभा निवडणुकींसंदर्भातील सर्वेक्षणांमध्ये पक्षाला मोठा फायदा होताना दिसत आहे. एका सर्वेक्षणात अरविंद केजरीवाल यांचा पक्ष दिल्लीत खातं उघडू शकतो, अशी शक्यता वर्तवण्यात आली आहे. तर पंजाबमध्ये 'आप'ला इंडिया अलायन्ससोबत एकापेक्षा जास्त जागा मिळू शकतात, असंही सर्वेक्षणाच्या निष्कर्षांमधून समोर आलं आहे. जाणून घ्या कोणत्या सर्वेक्षणात अरविंद केजरीवाल यांच्या पक्षाला किती जागा मिळाल्यात? 


या सर्वेक्षणात 'आप'ला अधिक फायदा?


इंडिया टीव्ही सीएनएक्सच्या सर्वेक्षणात दिल्लीच्या मुख्यमंत्र्यांच्या 'आप' पक्षाला आगामी लोकसभा निवडणुकांमध्ये 10 जागा मिळण्याचा अंदाज वर्तवण्यात आला आहे. ओव्हरऑल सर्व्हेमध्ये एनडीएला 318 जागा मिळण्याची शक्यता आहे. तर काँग्रेस आणि आपसह विरोधी इंडिया आघाडीला 175 जागा आणि इतरांना 50 जागा मिळाल्याचं दाखवण्यात आलं आहे. दिल्लीतील एकूण सात जागांपैकी इंडिया आघाडी दोन आणि एनडीएला 5 जागा जिंकता येतील. तर इंडिया आघाडी पंजाबमध्ये क्लीन स्वीप करू शकते. पंजाबमधील 13 जागांपैकी 'आप'ला 8 तर काँग्रेसला 5 जागा मिळू शकतात. या सर्वेक्षणाची आकडेवारी जुलैअखेर जाहीर करण्यात आली होती.


इंडिया आघाडीपूर्वी AAP ला किती जागा?


टाईम्स नाऊ ईटीजी सर्वेक्षणातही अरविंद केजरीवाल यांच्या पक्षाला 2024 च्या लोकसभा निवडणुकीत फायदा होण्याचा अंदाज वर्तवण्यात आला होता. सर्वेक्षणानुसार 'आप'ला 4 ते 7 जागा मिळण्याची शक्यता आहे. म्हणजेच, पक्षाला 2019 च्या निवडणुकीपेक्षा 3 ते 6 जागा जास्त मिळण्याचा अंदाज बांधला जाऊ शकतो. लोकसभेच्या एकूण जागांमध्ये भाजपच्या एनडीए आघाडीला 285 ते 325 जागा आणि काँग्रेसच्या यूपीए आघाडीला 111 ते 149 जागा मिळाल्याचं दाखवण्यात आलं आहे. महत्त्वाचं म्हणजे, हे सर्वेक्षण इंडिया आघाडीच्या स्थापनेपूर्वी करण्यात आलं होतं. ज्याचा निकाल जूनमध्ये आला होता. 


या महिन्यात जाहीर झालेल्या सर्वेक्षणात कोणाला किती जागा?


इंडिया टुडे सी-व्होटरनं या महिन्यात मूड ऑफ द नेशन सर्वेक्षण डेटा जारी केला आहे. 15 जुलै ते 14 ऑगस्ट दरम्यान हे सर्वेक्षण करण्यात आलं. यामध्ये एनडीएला 306 जागा आणि इंडिया आघाडीला 193 जागा मिळण्याची शक्यता आहे. तर इतरांना 44 जागा मिळू शकतात. आपबद्दल बोलायचं झालं तर केजरीवाल यांच्या पक्षाला दिल्लीत एकही जागा मिळालेली नाही. दिल्लीतील सातही जागा भाजपलाच मिळण्याची शक्यता या सर्वेक्षणातून समोर आलं आहे.


महत्त्वाच्या इतर बातम्या :