ठाणे : भिवंडी शहरात अल्पवयीन मुलीसह तिच्या आई-वडिलांना मारहाण केलेल्या आरोपींचा शोध घेण्यासाठी गेलेल्या पोलिस पथकावर स्थानिक जमावाने तुफान दगडफेक केल्याची घटना घडली. यामध्ये एक पोलिस जखमी झाला असून पोलिस वाहनाची तोडफोड झाली आहे.


पोलिस सूत्रांनी दिलेल्या माहितीनुसार, भिवंडी शहरातील वऱ्हाळ देवी नगर कामतघर या झोपडपट्टी परिसरात शेजाऱ्यांमधील मुलांचे  प्रेमप्रकरण असल्याच्या संशयातून  भांडण झाले. त्यामध्ये अल्पवयीन मुलीला आणि तिच्या आई-वडिलांना मारहाण करण्यात आली. या वेळी घाबरलेल्या अल्पवयीन मुलीने फिनेल पिऊन आत्महत्या करण्याचा प्रयत्न केला. यानंतर अल्पवयीन मुलीस उपचारासाठी आयजीएम रुग्णालयात दाखल करण्यात आले.


या घटनेची माहिती स्थानिक नारपोली पोलिस ठाण्यास मिळताच पोलिस आयजीएम रुग्णालयात दाखल झाले आणि त्यांनी अल्पवयीन मुलीचा जबाब घेतला. या गुन्ह्यातील आरोपी हे वऱ्हाळ देवी नगर झोपडपट्टी येथे असल्याची माहिती घेतल्यानंतर पोलिस उपनिरीक्षक आकाश पवार आणि सुनील शिंदे, तडवी हे पथक पोलिस जीप घेऊन घटनास्थळी आरोपींना पकडण्यासाठी गेले.


या वेळी तेथील काही गुंड प्रवृत्तीच्या युवकांनी या पोलिस पथकासोबत अरेरावीची भाषा वापरून त्यांना शिवीगाळ करत धक्काबुक्की केली. पोलिसांनी त्यांना अडवण्याचा आणि आरोपींना पकडण्याचा प्रयत्न केला. त्यावेळी 30 ते 40 जणांच्या जमावाने पोलिसांवर व पोलिस वाहनावर दगडफेक करत हल्ला चढवला.


यामध्ये पोलिस शिपाई तडवी यांना दगड लागल्याने ते जखमी झाले आहेत. यावेळी जमावाने पोलिस जीपवर सुद्धा हल्ला चढवल्याने जीप चे नुकसान झाले आहे. सध्या पोलिस शिपाई तडवी यांना खाजगी रुग्णालयात उपचारासाठी दाखल करण्यात आले आहे. 


नारपोली पोलिस ठाण्यात अल्पवयीन मुलीच्या आईकडून मारहाणीची तक्रार दाखल करण्यात आली आहे. तर पोलिस उपनिरीक्षक आकाश पवार यांनी सरकारी कामात अडथळा करून आरोपी पकडण्यास अटकाव करून हल्ला केल्याप्रकरणी दिलेल्या फिर्यादीवरून आरपीआय आठवले गटाचे भिवंडी शहर जिल्हा अध्यक्ष महेंद्र गायकवाड यांचे सुपुत्र उमेश गायकवाड, सचिन साठे, कृष्ण मंडल, नवीन उर्फ चिंट्या, शुभम परुळेकर, उमा वाघमारे, पंकज कांबळे आणि इतर 30 ते 40 जणांविरोधात गुन्हा दाखल करण्यात आला आहे. यातील चौघांना ताब्यात घेण्यात आले आहे. दुसरीकडे पोलिस आरोपींचा शोध घेत असून आरपीआय आठवले गटाचे भिवंडी शहर जिल्हा अध्यक्ष महेंद्र गायकवाड यांचे सुपुत्र फरार असल्याची माहिती पोलिसांनी दिले आहे. 


ही बातमी वाचा: