Amravati News अमरावती : पुण्यातील हिट अँड रन कार अपघाताची घटना (Porsche Car Accident) संपूर्ण देशभर गाजत असतानाच अमरावती शहरात देखील अशीच एक घटना घडली होती. यात अमरावतीच्या (Amravati News) गाडगे नगर पोलीस ठाण्याच्या हद्दीत 3 मे च्या दुपारी संमती कॉलनी परिसरात एका भरधाव कार चालकाने भर दिवसा एका इसमाला जोरदार धडक दिली. त्यानंतर गंभीर अवस्थेत असलेल्या या इसमाला तसेच सोडून कार चालकाने पळ काढला होता.
हा अपघात इतका भीषण होता की यात या व्यक्तीचा उपचार दरम्यान मृत्यू झाला. ही घटना होऊन आज 22 दिवस उलटले असले तरी अद्यापही या कारचालकाला अटक करण्यात आलेली नाही. एकीकडे राज्यात पुण्यातील हिट अँड रन प्रकरणामुळे समाजमन हेलावून गेलं असताना अमरावतीच्या या घटनेचेही स्मरण अमरावतीकरांना होत आहे. परिणामी, यातील दोषींवर कारवाई करण्यात यावी, अशी मागणी आता जोर धरू लागली आहे.
22 दिवसानंतरही आरोपी फरारच!
अमरावती शहरातील किशोर नगर येथील रहिवासी भीमसेन वाहने हे कठोरा रोडवरील संमती कॉलनीतून आपल्या दुचाकी वाहनाने जात होते. दरम्यान, एका भरधाव इंडिका कारने त्यांना जोरदार धडक देत उडविले. त्यानंतर या कारमधील तरुण बाहेर आले आणि परत कारमध्ये बसून निघून गेले. यावेळी त्यांनी जखमी भीमसेन यांना रुग्णालयात दाखल करण्याची देखील तसदी न घेता घटनास्थळावरून निघून गेले. काही वेळानंतर परिसरातील नागरिकांनी भीमसेन वाहने यांना रुग्णालयात दाखल केले.
मात्र, त्यांच्या डोक्याला गंभीर इजा झाल्याने त्यांचा 15 मे रोजी उपचारअंती मृत्यू झाला. ही संपूर्ण घटना सीसीटीव्ही कॅमेरात कैद झाली होती. त्यानंतर या संपूर्ण घटनेची तक्रार गाडगे नगर पोलीस ठाण्यात देण्यात आली. मात्र 22 दिवसानंतरही पोलिसांनी अद्यापही या प्रकरणातील आरोपींना अटक केलेली नाही. यामुळे कुटुंबीयांमध्ये आणि शहरातील नागरिकांमध्ये पोलिसांविषयी संताप व्यक्त केला जात आहे.
नागपुरातील ड्रंक अँड ड्राईव्ह प्रकरणात तिघांना अटक
पुण्यातील हिट अँड रन अपघात प्रकरण राज्यभरात गाजत असतानाच दुसरीकडे नागपूर शहरामध्ये अशाच पद्धतीची घटना घडली आहे. शहरातील दाटीवाटीचा परिसर असलेल्या महाल परिसरातील झेंडा चौकात एका मद्यधुंद कारचालकाने बेदारकपणे वाहन चालवत तिघांना धडक देत जखमी केलंय. यात पायी जाणारी महिला, पुरुष आणि तीन महिन्याचा चिमुकल्याचाही समावेश आहे.
तर या अपघातात बाळाची अवस्था गंभीर असल्याची माहिती समोर आली आहे. शुक्रवारी रात्री साडेआठ वाजताच्या सुमारात झेंडा चौकात ही घटना घडली होती. असे असताना या तपासात आता पोलिसांना धक्कादायक माहिती हाती लागली आहे. या प्रकरणातील संशयित आरोपींच्या गाडीमध्ये दारूच्या बाटल्या आणि गांजा देखील आढळून आला आहे.
इतर महत्वाच्या बातम्या