TCS Infringement Case: देशातील सर्वात मोठी आयटी कंपनी 'टाटा कन्सल्टन्सी सर्व्हिसेस'ला (Tata Consultancy Services -TCS) मोठा झटका बसला आहे. टीसीएसवर त्याचे एक सॉफ्टवेअर विकसित करताना स्पर्धक कंपनीचा एक सोर्स कोड चोरल्याचा आरोप आहे. आता या प्रकरणात भारतातील सर्वात मोठ्या आयटी कंपनीला मोठा आर्थिक दंड सहन करावा लागू शकतो.
1800 कोटींचा भुर्दंज
अमेरिकेतील IT कंपनी DXC, पूर्वी CSC म्हणून ओळखली जात होती. TCS ने आपला सॉफ्टवेअर प्लॅटफॉर्म TCS Bancs विकसित करण्यासाठी त्याचा सोर्स कोड वापरला असल्याचा आरोप आहे. आता या प्रकरणात, यूएस ज्युरीने TCS ला DXC 210 दशलक्ष डॉलर म्हणजेच सुमारे 1,800 कोटी रुपये भरण्यास सांगितले आहे.
या करारावरून वाद सुरू
भारतीय आयटी कंपनीने ट्रेड सिक्रेट अॅक्सेस केला असल्याचे ज्युरींचे म्हणणे आहे. हे प्रकरण सुमारे पाच वर्षे जुने आहे. 2018 मध्ये TCS आणि Transamerica यांच्यात 2.5 बिलियन डॉलर किमतीचा करार झाला. स्थूल आर्थिक परिस्थितीमुळे जून 2023 मध्ये हा करार रद्द करण्यात आला. खटला या कराराशी संबंधित आहे.
DXC ने आरोप काय केला?
DXC ने 2019 मध्ये या संदर्भात खटला दाखल केला होता. DXC ने केलेल्या दाव्यानुसार, TCS ने बँकिंग प्लॅटफॉर्म विकसित करण्यासाठी नियुक्त केलेल्या कर्मचाऱ्यांना विशिष्ट विमा प्रकरणासाठी परताव्याचा दर मोजू शकणारे सॉफ्टवेअर तयार करण्यात अडचणी येत होत्या. व्हँटेज सॉफ्टवेअर हे काम सहजपणे करत असल्याचे त्या कर्मचाऱ्यांना आढळून आले. त्यानंतर कर्मचाऱ्यांनी व्हँटेजचा सोर्स कोड कॉपी करून तो वापरला. DXC ने खटल्यासोबत संबंधित TCS कर्मचाऱ्यांचे ईमेल तपशील देखील दिले आहेत.
टीसीएसकडून आदेशाला आव्हान
तर, दुसरीकडे टीसीएसचे म्हटले की, कंपनी ज्युरीच्या निर्णयाशी सहमत नाही. टीसीएसने एक निवेदन जारी करून म्हटले आहे की या प्रकरणावर आता न्यायालय निर्णय घेईल. न्यायालयाने दोन्ही पक्षांना आपले म्हणणे मांडण्यास सांगितले आहे. हे प्रकरण अद्याप न्यायप्रविष्ट असल्याने ते या विषयावर अधिक भाष्य करणार नसल्याचे टीसीएसने म्हटले आहे.