उर्जानिर्मिती करणाऱ्या 'या' कंपनीचा शेअर तुम्हाला करू शकतो मालामाल; 'हे' आहे कारण!

उर्जानिर्मिती क्षेत्रातील अग्रगण्य कंपन्यांत या कंपनीचे नाव घेतले जाते. आगामी काळात ही कंपनी चांगला परतावा देण्याची शक्यता व्यक्त केली जात आहे.

मुंबई : सध्या उन्हाळा चालू आहे. या काळात विजेचा मोठ्या प्रमाणात वापर होतो. याचा परिणाम वीजनिर्मिती क्षेत्रात काम करणाऱ्या कंपन्यांच्या समभागांवर पडण्याची शक्यता आहे. असे असतानाच आता उर्जानिर्मिती क्षेत्रात काम करणाऱ्या जेएसडब्ल्यू निओ एनर्जी लिमिटेड (JSW Neo Energy) या कंपनीला सरकारच्या एनटीपीसी या कंपनीने वीजनिर्मिती प्रकल्प उभा करण्याची मोठी ऑर्डर दिली आहे. जेएसडब्ल्यू निओ एनर्जी लिमिटेड ही जेएसडब्ल्यू एनर्जी या दिग्गज कंपनीची उपकंपनी आहे. त्यामुळे आगामी काळात या कंपनीच्या शेअरचे मूल्य वाढण्याची शक्यता आहे. 

आगामी काळात शेअर प्राईज वाढण्याची शक्यता?

मिळालेल्या माहितीनुसार नॅशनल थर्मल पॉवर कॉर्पोरेशन म्हणजेच एनटीपीसी या कंपनीने जेएसडब्ल्यू निओ एनर्जी या कंपनीला  700 MW उर्जानिर्मिती करणाऱ्या सोलार पॉवर प्रोजेक्टची निर्मिती करण्याची ऑर्डर दिली आहे. या ऑर्डरमुळे आगामी काळात या कंपनीच्या शेअरचे मूल्य वाढू शकते. सध्या भांडवली बाजारात या शेअरचे मूल्य 625 रुपये (JSW Energy Share Price) आहे. गेल्या एका महिन्यात या कंपनीच्या समभागांत 30 टक्क्यांची तेजी आलेली आहे. JSW Energy कंपनीची उर्जानिर्मितीची क्षमता 13.3 GW पर्यंत पोहोचली

मुंबई शेअर बाजार अर्थात बीएसईच्या संकेतस्थळार उपलब्ध असलेल्या माहितीनुसार एनटीपीसीच्या या नव्या ऑर्डरमुळे जेएसडब्लूय एनर्जी कंपनीच्या उर्जीनिर्मिती क्षमतेत वाढ होणार आहे. या ऑर्डरमुळे JSW Energy कंपनीची लॉक्ड-इन जनरेशन कॅपेसिटी ही 13.3 GW वर पोहोचली आहे. सध्या या कंपनीची इन्स्टॉल्ड उर्जानिर्मितीची क्षमता 7.2 GW आहे. 2024 वर्षाच्या शेवटपर्यंत ही क्षमता 9.8 GW पर्यंत वाढण्याची शक्यता आहे. या कंपनीच्या 2.6 GW उर्जानिर्मिती क्षमतेच्या प्रकल्पाचे काम चालू आहे.  

जेएसडब्ल्यू कंपनीच्या शेअरचे मूल्य काय आहे? (JSW Energy Share Price History)

JSW Energy या कंपनीच्या शेअरचे सध्याचे मूल्य 625 आहे.19 एप्रिल म्हणजेच शुक्रवारी या कंपनीचा शेअर 638 रुपयांपर्यंत गेला होता. या आठवड्यात या शेअरमध्ये दोन टक्के, दोन आठवड्यांत 4.5 टक्के, एक महिन्यात 30 टक्के, तीन महिन्यांत 25 टक्के, सहा महिन्यांत 55 टक्के तर एका वर्षांत 150 टक्क्यांची वाढ झाल्याचे पाहायला मिळाले.  

जेएसडब्ल्यू एनर्जी ही कंपनी नेमकं काय करते? 

जेएसडब्ल्यू एनर्जी ही कंपनी प्रामुख्याने वीजनिर्मिती क्षेत्रात काम करते. 2030 सालापर्यंत 20 GW उर्जानिर्मिती करण्याचे तसेच 40 GWh उर्जेला साठवण्याची क्षमता निर्माण करण्याचे या कंपनीचे लक्ष आहे. या कंपनीने 2050 कार्बन न्यूट्रलिटीचे ध्येय्य गाठण्याचा निश्चय व्यक्त केलेला आहे. ही कंपनी खासगी क्षेत्रातील वीजनिर्मिती करणारी आघाडीच्या कंपन्यांतील एक कंपनी आहे. 

(टीप- फक्त माहिती देणे, हाच या लेखामागचा उद्देश आहे. आम्ही कोणत्याही प्रकारची गुंतवणूक करण्याची सल्ला देत नाही. गुंतवणूक करायची असल्यास या क्षेत्रातील तज्ज्ञांशी संपर्क साधावा)

हेही वाचा :