गणपती विसर्जनाच्या उत्तरपूजेचा विधी आणि मंत्र!

गणेशोत्सवाचा सण राज्यात अगदी जल्लोषात सुरु आहे. घरोघरी बाप्पा विराजमान झाल्यावर अवघ्या दीड दिवसांनी घरगुती बाप्पाचं विसर्जन केलं जातं.

अशा वेळी गणपतीची उत्तरपूजा कशी करावी असा अनेकांना प्रश्न पडतो.

गणपतीचं विसर्जन करताना कोणते विधी आणि मंत्र उच्चारले जावेत याचविषयी अधिक जाणून घेऊयात.

सकाळी उठल्यावर नेहमीप्रमाणे गणपती बाप्पाची पंचोपचार पूजा करावी. बाप्पाला मोदक, लाडू आणि मिठाईचा नैवेद्य दाखवावा आणि नवीन वस्त्रे अर्पण करावीत.

आचम्य :

श्रीसिद्धिविनायकमहागणपतीप्रीत्यर्थं गंधादिपंचोपचारैः उत्तरपूजनं करिष्ये । महागणपतये नमः विलेपनार्थे चंदनं समर्पयामिः । अक्षतां हरिद्रां कुंकुमं समर्पयामि। श्रीमहागणपतये नमः । सिंदूरंदूर्वांकुरान् कालोद्भवपुष्पाणिच समर्पयामि ।

हे मंत्र म्हणून गणपतीला गंध, फुले, अक्षता, हळद कुंकू, दूर्वा, शेंदूर हे अर्पण करावे.

श्रीमहागणपतये नमः । धूपं समर्पयामि । महागणपतये नमः । दीपं समर्पयामि । महागणपतये नमः । नैवेद्यं समर्पयामि ।

वरील मंत्र म्हणून गणपतीला धूप, दीप ओवाळावा , नैवेद्य दाखवावा आणि कापूर लावून आरती करावी.

पूजेच्या शेवटी दिलेले मंत्रपुष्प आणि प्रार्थनेचे मंत्र म्हणून एका कापडात सुपारी, दुर्वा, मिठाई आणि काही पैसे ठेवावे. या सगळ्या वस्तू त्या कापडात गुंडाळून गणपतीच्या मूर्तीजवळ ठेवावे .

विसर्जनापूर्वी गणपतीची मनापासून आरती करावी आणि या काळात आपल्याकडून काही चूक झाली असेल तर त्याबद्दल क्षमा मागावी. तसेच, पूजेचे साहित्य विसर्जित करावे.

(टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.)