सांगली : पतंगराव कदम अनंतात विलीन, वांगी गावात अंत्यसंस्कार

काँग्रेसचे ज्येष्ठ नेते पतंगराव कदम यांच्या पार्थिवावर सांगलीतील वांगी येथे अंत्यसंस्कार करण्यात आले. त्यांचं पार्थिव आज पहाटेच मुंबईहून पुण्याकडे रवाना झालं होतं. पतंगराव यांचे चिरंजीव विश्वजीत कदम यांनी पार्थिवाला मुखाग्नी दिला.

यावेळी मुख्यमंत्री देवेंद्र फडणवीस, काँग्रेसचे नेते अशोक चव्हाण, पृथ्वीराज चव्हाण, केंद्रीय मंत्री रामदास आठवले, विधानसभेचे विरोधी पक्षनेते राधाकृष्ण विखे पाटील, राष्ट्रवादी काँग्रेसचे नेते अजित पवार यांच्यासह विविध पक्षाचे मोठे नेते उपस्थित होते. पतंगराव यांना मानणारा मोठा वर्ग आणि त्यांच्या कार्यकर्त्यांनीही यावेळी मोठी गर्दी केली. अंत्यसंस्काराला उपस्थित असलेल्या अनेक कार्यकर्त्यांना यावेळी अश्रू अनावर झाले.