पालघर : निवडणुकीत पैसे वाटल्याचा आरोप, संजय राऊत आक्रमक

पालघर : शिवसेना आणि भाजपमधला वाद विकोपाला जाण्याची शक्यता आहे. कारण, पालघर लोकसभा पोटनिवडणुकीत भाजपच्या नेत्यांनी मतदारांना आकर्षित करण्यासाठी पैसे वाटप केल्याचा आरोप शिवसेनेने केला आहे.

पालघरमधील रानशेत भागात आज शिवसैनिकांनी काही लोकांना पैसे वाटताना रंगेहात पकडलं. त्यावेळी पैसे वाटणाऱ्यानी हे पैसे भाजपने आपल्याला दिल्याची कबुली दिली. भाजपचे शहराध्यक्ष अशोक अंबोरे यांचेच हे पैसे असल्याची कबुली पैसे वाटणाऱ्या तरुणांनी दिली आहे.

दरम्यान, या प्रकरणी पोलिसात तक्रार दाखल करण्यात आली असून भाजपच्या उमेदवाराची उमेदवारी रद्द करावी, अशी मागणी शिवसेनेने केली आहे. त्यामुळे अचानकपणे उफाळून आलेल्या या लक्ष्मीदर्शनाच्या प्रकारामुळे शिवसेना-भाजपात मोठा संघर्ष पेटणार आहे.