Accident : ICU मधील अत्यवस्थ रुग्णाला रेमडेसिवीरऐवजी दिलं अॅसिडिटीचं इंजेक्शन

नागपूर : रेमडेसिविर इंजेक्शनचा तुटवडा जाणवत असल्यामुळे या इंजेक्शनचा काळाबाजार करणाऱ्यांचं धाडस कितपत वाढलं आहे, याचा अत्यंत धक्कादायक आणि दुर्दैवी प्रकार नागपुरात पाहायला मिळाला आहे. आयसीयूमध्ये दाखल अत्यवस्थ रुग्णाला रेमडेसिवीरऐवजी चक्क अॅसिडिटीचे इंजेक्शन टोचले आणि त्या रेमडेसिवीरचा काळाबाजार केला.

नागपुरातील जामठा परिसरातील 'कोविडालय' नावाच्या रुग्णालयात दिनेश गायकवाड नावाच्या पुरुष नर्सला आयसीयूमध्ये दाखल असलेल्या आणि अत्यवस्थ असलेल्या एका रुग्णाला लावण्यासाठी रुग्णालय प्रशासनाने तीन रेमडेसिवीर इंजेक्शन दिले होते. मात्र, दिनेश गायकवाडने (आरोपी पुरुष नर्स) तीनपैकी दोन रेमडेसिवीर इंजेक्शन आपल्याकडे ठेवले आणि त्याऐवजी अत्यवस्थ रुग्णाला चक्क अॅसिडिटीचे इंजेक्शन टोचले. त्यानंतर रुग्णालयातील रेकॉर्डवर संबंधित रुग्णाला विशिष्ट कालावधीत तीन रेमडेसिवीर इंजेक्शन टोचल्याची नोंद केली.