Ajit Pawar PC : 'पार्थला ती जमीन सरकारची आहे, हे माहीत नव्हतं', अजित पवारांचे स्पष्टीकरण

पुण्यातील कोट्यवधी रुपयांच्या वादग्रस्त जमीन व्यवहार प्रकरणी उपमुख्यमंत्री अजित पवार यांनी अखेर मौन सोडलं आहे. हा वादग्रस्त व्यवहार रद्द करण्यात आल्याची माहिती त्यांनी दिली. अजित पवार म्हणाले, 'पार्थ आणि त्याच्या व्यावसायिक भागीदाराला ही जमीन सरकारी मालकीची आहे, याची माहिती नव्हती'. पुणे जिल्ह्यातील मुंधवा परिसरातील ४० एकर 'महार वतन' जमिनीचा हा वाद आहे. या जमिनीची किंमत सुमारे १८०० कोटी रुपये असताना, पार्थ पवार यांच्या अमेडिया एंटरप्रायझेस कंपनीने ती केवळ ३०० कोटी रुपयांना खरेदी केल्याचा आरोप आहे. या व्यवहारात मुद्रांक शुल्कातही अनियमितता झाल्याचे समोर आले आहे. मुख्यमंत्री देवेंद्र फडणवीस यांनी या प्रकरणाला 'गंभीर' म्हटले असून, चौकशीसाठी समिती स्थापन केली आहे, जी एका महिन्यात आपला अहवाल सादर करेल.