Munde Alliance: 15 वर्षांनंतर परळी नगरपरिषदेसाठी मुंडे बहीण-भाऊ एकत्र, युतीवर आज शिक्कामोर्तब!

बीडच्या राजकारणातली सर्वात मोठी बातमी समोर येत आहे, जिथे १५ वर्षांनंतर मुंडे बहीण-भाऊ राजकीय मतभेद विसरून एकत्र येत आहेत. भाजपच्या राष्ट्रीय सचिव आणि विधानपरिषद आमदार पंकजा मुंडे (Pankaja Munde) आणि राज्याचे माजी मंत्री व राष्ट्रवादी काँग्रेसचे आमदार धनंजय मुंडे (Dhananjay Munde) यांच्यात परळी नगरपरिषद निवडणुकीसाठी युती करण्यावर शिक्कामोर्तब होणार आहे. या युतीनुसार, नगरपरिषदेच्या एकूण ३५ जागांपैकी २० ते २३ जागांवर राष्ट्रवादी काँग्रेस (अजित पवार गट) तर १२ ते १५ जागांवर भाजप निवडणूक लढवण्याची शक्यता वर्तवण्यात येत आहे. २०१६ साली झालेल्या निवडणुकीत धनंजय मुंडे यांच्या नेतृत्वाखालील राष्ट्रवादी आघाडीने २८ जागा जिंकल्या होत्या, तर भाजप महायुतीला केवळ ५ जागांवर समाधान मानावे लागले होते. त्यामुळे आता होणारी ही युती परळीच्या राजकारणात मोठे बदल घडवणारी ठरू शकते.