NCERT Map Controversy | जैसलमेर घराण्याचा NCERT पुस्तकातील नकाशावर आक्षेप, पूर्वजांचा अवमान

जैसलमेर घराण्याने एनसीईआरटीच्या आठव्या वर्गाच्या पुस्तकावर आक्षेप घेतला आहे. या पुस्तकात छापलेल्या मराठा साम्राज्याच्या नकाशात जैसलमेरला मराठा साम्राज्याचा भाग दाखवण्यात आले आहे. ही बाब दिशाभूल करणारी आणि तथ्यहीन असल्याचं घराण्याचं म्हणणंय. पूर्वजांच्या बलिदानाचा अवमान झाल्याचा आरोप जैसलमेर घराण्याने केला आहे. राजघराण्याचे वंशज चैतन्य राजसिंग यांनी याविषयी सोशल मीडियात एक पोस्ट केली आहे. त्यामुळे केंद्रीय शिक्षण मंत्री धर्मेंद्र प्रधान यांनी या ज्वलंत मुद्द्याकडे लक्ष द्यावं अशी मागणी जैसलमेर घराण्यानं केली आहे. या नकाशामुळे ऐतिहासिक तथ्यांशी छेडछाड झाल्याचा आरोप करण्यात येत आहे. या प्रकरणी NCERT आणि शिक्षण मंत्रालयाने स्पष्टीकरण द्यावे अशी अपेक्षा व्यक्त केली जात आहे.