Mumbai Pollution: मुंबईची हवा पुन्हा 'मध्यम' श्रेणीत, शहराचा AQI 106 वर, नागरिकांच्या आरोग्याचा प्रश्न ऐरणीवर

मुंबई आणि दिल्लीतील हवेच्या प्रदूषणात वाढ झाल्याने नागरिकांच्या चिंतेत भर पडली आहे. पावसामुळे ऑक्टोबर महिन्यात सुधारलेली मुंबईतील हवेची गुणवत्ता आता पुन्हा घसरली आहे. शहरातील हवेचा निर्देशांक १०६ वर पोहोचला असून तो 'मध्यम' श्रेणीत गणला जातो. शनिवारी नोंदवलेल्या आकडेवारीनुसार, वांद्रे-कुर्ला संकुल (१९२), देवनार (१७२), आणि शिवडी (१५७) यांसारख्या अनेक भागांमध्ये हवा गुणवत्ता निर्देशांक 'मध्यम' पातळीवर पोहोचला आहे, तर काही ठिकाणी तो 'समाधानकारक' आहे. दुसरीकडे, देशाची राजधानी दिल्लीतील हवेची गुणवत्ता 'गंभीर' श्रेणीत पोहोचली असून, अनेक भागांमध्ये AQI ४०० च्या वर गेला आहे. तज्ज्ञांच्या मते, कमी झालेला वाऱ्याचा वेग आणि वातावरणातील बदलांमुळे प्रदूषक कण हवेतच राहत असल्याने ही परिस्थिती निर्माण झाली आहे.