7Years of Modi Government : काँग्रेसचं सरकार असताना झालेल्या कामामुळे देशाचा कारभार सुरु : संजय राऊत

7 Years of Modi Government :  मोदी सरकारला देशात सत्तेवर येऊन 7 वर्षे पूर्ण झाली आहेत. त्याचनिमित्तानं आपली प्रतिक्रिया देत माध्यमांशी संवाद साधताना संजय राऊत यांनी महत्त्वाचे मुद्दे मांडले. 

'राहुल गांधी यांचं म्हणणं अतिशय गांभीर्यानं ऐकण्याची गरज होती, मोदी सरकारला 7 वर्ष झाली. पहिली पाच वर्षे आणि दुसरी दोन वर्षे तर कोरोनामध्ये वाहून गेली. पण, अद्यापही त्यांनी देशासाठी खूप काही करणं अपेक्षित आहे. आता तर, देश मागच्या 60 वर्षांच्या पुण्याईवरच चालत आहे', असं म्हणत काँग्रेस सरकारनं केलेल्या कामगिरीच्याच बळावर देशाचा कारभार सुरु आहे, या शब्दांत शिवसेना खासदार संजय राऊत यांनी मोदी सरकारचे कान टोचले.

काँग्रेसची कामगिरी कोणालाही नाकारता येणार नाही, असंही त्यांनी माध्यमांशी संवाद साधताना स्पष्ट केलं. सरकारला जनता बहुमत देते याचा अर्थ असा की सरकारला लोकांचा विश्वास मिळाला आहे. पण, आज देशात बेरोजगारी, महागाई आणि देशात ज्या प्रकारे अराजकता माजली आहे ते पाहता परिस्थिती विचार करण्याजोगी आहे, असं ते म्हणाले.