Parth Pawar Pune Land Scam: मुंडवा जमीन प्रकरण: मनसे आक्रमक, पार्थ पवारांचे पुतळे जाळले

पुण्यातील मुंडवा येथील कथित जमीन घोटाळ्याप्रकरणी महाराष्ट्र नवनिर्माण सेनेने (MNS) उपमुख्यमंत्री अजित पवार (Ajit Pawar) आणि त्यांचे पुत्र पार्थ पवार (Parth Pawar) यांच्याविरोधात आंदोलन केले आहे. 'अजित दादांनी नैतिक जबाबदारी स्वीकारून राजीनामा द्यावा', अशी जोरदार मागणी मनसेने केली आहे. पार्थ पवार यांच्या अमेडिया (Amedia) कंपनीने ३०० कोटी रुपयांची जमीन घेतल्याचा आरोप असून, या प्रकरणी मनसेने आक्रमक पवित्रा घेतला आहे. पुण्यातील खडकमाळ तहसील कार्यालयावर, जिथे या व्यवहाराची नोंदणी झाली होती, तिथेच मनसेने आंदोलन करत अजित पवार आणि पार्थ पवार यांच्या पुतळ्यांचे दहन केले. या प्रकरणात पार्थ पवार ९९ टक्के भागीदार असूनही त्यांच्यावर गुन्हा दाखल झालेला नाही, केवळ त्यांच्या भागीदारावर आणि तहसीलदारावर कारवाई झाली आहे, असा आरोप आंदोलकांनी केला आहे. सत्तेचा दुरुपयोग करून हा व्यवहार झाल्याचा दावा करत, जोपर्यंत पार्थ पवारांवर गुन्हा दाखल होत नाही आणि अजित पवार राजीनामा देत नाहीत, तोपर्यंत आंदोलन सुरूच ठेवण्याचा इशारा मनसेने दिला आहे.