Maharashtra Rains: कोकणातील बळीराजा हवालदिल, मदतीसाठी सरकारला साकडं

कोकणात परतीच्या पावसाने थैमान घातल्याने भात शेतीचं मोठं नुकसान झालं आहे, ज्यामुळे शेतकरी हवालदिल झाला आहे. या पार्श्वभूमीवर, ठाकरे गटाचे नेते भास्कर जाधव (Bhaskar Jadhav) यांनी सरकारकडे मदतीची मागणी केली आहे, तर उद्योगमंत्री उदय सामंत (Uday Samant) यांनी पंचनाम्यांचे आदेश दिल्याची माहिती दिली आहे. 'विदर्भ आणि मराठवाड्यातील शेतकऱ्यांना ज्या पद्धतीनं मदत दिली त्याच पद्धतीची मदत ही कोकणातील शेतकऱ्यांना द्यावी,' असं पत्र भास्कर जाधव यांनी मुख्यमंत्र्यांसह कृषिमंत्र्यांना पाठवले आहे. भारतीय हवामान विभागाने (IMD) ऑक्टोबरमध्ये सरासरीपेक्षा जास्त पावसाचा अंदाज वर्तवला होता, जो खरा ठरला. आधीच मे महिन्यातील पेरणीपूर्व पावसामुळे पेरण्या रखडल्या होत्या आणि आता परतीच्या पावसाने हातातोंडाशी आलेला घास हिरावून घेतल्याने शेतकरी संकटात सापडला आहे. मुख्यमंत्र्यांनी नुकसानग्रस्त भागाचे पंचनामे करण्याचे निर्देश दिल्याची माहिती उदय सामंत यांनी दिली असली तरी, विदर्भ-मराठवाड्याच्या धर्तीवर तातडीने मदत मिळावी, अशी मागणी जोर धरत आहे.