Mahadevi Elephant | महादेवीला माघारी आणण्यासाठी सरकार प्रयत्नशील,सरकार सुप्रीम कोर्टात - मुख्यमंत्री

महादेवी हत्तीणीसंदर्भात राज्य सरकार आता सुप्रीम कोर्टात याचिका दाखल करणार आहे. कोल्हापूर आणि सांगलीच्या लोकप्रतिनिधींच्या शिष्टमंडळाची बैठक झाली. या बैठकीत महादेवी हत्तीण परत आणण्याची इच्छा व्यक्त करण्यात आली. सरकारही या प्रकरणात पक्षकार होणार असल्याचे सांगण्यात आले. मात्र, प्रकरण न्यायप्रविष्ट असल्याचे सांगत काही लोकप्रतिनिधींनी चिंता व्यक्त केली. Vantara येथील अभयारण्यातील व्यवस्थेवरही प्रश्नचिन्ह उपस्थित करण्यात आले. राज्यातून Vantara येथे गेलेले काही हत्ती हयात नाहीत, अशी माहिती समोर आली. यावर चौकशीची मागणी करण्यात आली. माधुरी हत्तीच्या निमित्ताने मठाच्या माध्यमातून सुप्रीम कोर्टात रिव्यू पिटिशन दाखल करण्यात यावे, असे सांगण्यात आले. राज्य सरकार इंटरव्हेंशन पिटिशन दाखल करेल आणि सर्वसामान्य जनतेची जनभावना मांडेल. पाळीव हत्तींच्या उपचाराची आणि संवर्धनाची जबाबदारी राज्य सरकार घेईल. Vantara आणि PETA हे दोन्ही संशयाच्या भोवऱ्यात असल्याचे नमूद करण्यात आले. सरकार पक्षकार होण्यासोबतच हत्ती संवर्धनासाठीच्या सर्व सुविधाही पुरवणार असल्याचे सांगण्यात आले. "महादेवी हत्तीण परत आली पाहिजे अशी आपल्या सर्वांची इच्छा आहे. मठाने एक याचिका दाखल करावी सरकारही याचिका दाखल करेल." असे बैठकीत स्पष्ट करण्यात आले. हत्तीणीची निगा राखण्यासाठी डॉक्टरसह राज्य सरकार टीम तयार करेल आणि आवश्यक ती सर्व मदत करेल.