Cough Syrup Alert: 'दोन वर्षांखालील मुलांना खोकल्याची औषधं देऊ नका', केंद्राचे रुग्णालयांना थेट निर्देश!

केंद्र सरकारच्या आरोग्य सेवा महासंचालनालयाने (DGHS) लहान मुलांसाठी कफ सिरपच्या (Cough Syrup) वापरावर नवीन मार्गदर्शक तत्त्वे जारी केली आहेत. देशभरातील रुग्णालयांना 'दोन वर्षाखालील मुलांना खोकला आणि सर्दीची औषधे देऊ नयेत,' असे स्पष्ट निर्देश देण्यात आले आहेत. यासोबतच, पाच वर्षांखालील मुलांसाठीही अशी औषधे सामान्यपणे सुचवू नयेत, कारण अनेकदा असे आजार कोणत्याही औषधोपचाराशिवाय बरे होतात, असेही केंद्राने म्हटले आहे. मध्य प्रदेश आणि राजस्थानमध्ये कफ सिरपच्या वापराशी संबंधित मुलांच्या मृत्यूच्या घटनांनंतर खबरदारीचा उपाय म्हणून ही कठोर पावले उचलण्यात आली आहेत. सरकारने सर्व राज्यांना या सूचनांची तात्काळ अंमलबजावणी करण्यास सांगितले आहे.