Red Fort Blast: फरीदाबादमधून ३६० किलो स्फोटकं जप्त, डॉक्टर अटकेत; दिल्ली स्फोटामागे 'व्हाईट कॉलर' दहशतवाद्यांचा हात?

दिल्लीतील लाल किल्ला (Red Fort) परिसरात झालेल्या भीषण कार स्फोटानंतर (Delhi Blast) देशभरात हाय अलर्ट जारी करण्यात आला आहे. पंतप्रधान नरेंद्र मोदी (Narendra Modi) यांनी गृहमंत्री अमित शाह (Amit Shah) यांच्याकडून परिस्थितीचा आढावा घेतला. 'दिल्लीमध्ये हाय अलर्ट जारी करण्यात आला असून सगळे जे महामार्ग आहेत त्या महामार्गांवर प्रत्येक गाड्यांची कसून तपासणी केली जात आहे', अशी माहिती पोलिसांनी दिली आहे. या स्फोटात अनेकांचा मृत्यू झाला असून अनेकजण जखमी झाले आहेत. दिल्ली स्फोटाच्या काही तास आधीच, हरियाणातील फरीदाबादमध्ये एका मोठ्या दहशतवादी कटाचा पर्दाफाश झाला होता. जम्मू-काश्मीर पोलिसांच्या संयुक्त कारवाईत, एका डॉक्टरच्या घरातून सुमारे ३६० किलो अमोनियम नायट्रेट (Ammonium Nitrate) आणि शस्त्रसाठा जप्त करण्यात आला. या प्रकरणी 'व्हाईट कॉलर' टेरर मॉड्यूलचा सहभाग असल्याचा संशय असून, राष्ट्रीय तपास यंत्रणा (NIA) या दोन्ही घटनांचा संबंध तपासून पाहत आहे.