Govt Spending Row : उधळपट्टीमुळे मुख्यमंत्री संतापले, 'मंत्र्यांच्या बंगल्यावर ३५ लाखांवर खर्च नको'

नागपूरमधील हिवाळी अधिवेशनाच्या पार्श्वभूमीवर मंत्र्यांच्या निवासस्थानाच्या डागडुजीवर होणाऱ्या अवाजवी खर्चावरून मुख्यमंत्री देवेंद्र फडणवीस यांनी सार्वजनिक बांधकाम विभागाच्या (PWD) अधिकाऱ्यांची खरडपट्टी काढली आहे. 'कोणत्याही मंत्र्याच्या बंगल्यावर ३५ लाखांपेक्षा जास्त निधी खर्च करू नका,' असे स्पष्ट निर्देश मुख्यमंत्री फडणवीस यांनी दिले आहेत. नागपूरच्या रविभवन येथील मंत्र्यांच्या बंगल्यांच्या नूतनीकरणावर होणाऱ्या उधळपट्टीबद्दल त्यांनी तीव्र नाराजी व्यक्त केली. विशेषतः विधानसभा अध्यक्षांच्या बंगल्याच्या डागडुजीसाठी अंदाजे १ कोटी २५ लाख रुपयांचा खर्च अपेक्षित होता, ज्याचे कामही सुरू झाले होते. या प्रकरणामुळे अधिवेशनाच्या तयारीतील प्रशासकीय कामकाजावर आणि खर्चाच्या नियोजनावर प्रश्नचिन्ह निर्माण झाले आहे.