Public Outcry: भंडारा-बालाघाट महामार्गावर खड्ड्यांचे साम्राज्य, संतप्त नागरिकांचा तुमसरमध्ये 'रास्ता रोको'

भंडारा ते मध्य प्रदेशातील बालाघाटला जोडणाऱ्या राष्ट्रीय महामार्गाच्या दुर्दशेमुळे नागरिक संतप्त झाले आहेत. या महामार्गावर, विशेषतः भंडारा ते तुमसर दरम्यान, मोठमोठे खड्डे पडले असून त्यामुळे अनेक अपघात झाले आहेत. 'भंडारा ते तुमसर शहरापर्यंतचा मार्ग अत्यंत खराब झाला असून तो तातडीने दुरुस्त करावा', अशी मागणी करत नागरिकांनी प्रशासनावर दुर्लक्षाचा आरोप केला आहे. या समस्येकडे लक्ष वेधण्यासाठी तुमसरच्या खापा चौकात नागरिकांनी 'रास्ता रोको' आंदोलन केले. राज्य सरकारच्या बांधकाम विभागाविरोधात जोरदार घोषणाबाजी करत वाहतूक रोखून धरली. काही काळ वाहतूक विस्कळीत झाल्यानंतर, तुमसर पोलिसांनी आंदोलकांना ताब्यात घेतले आणि वाहतूक पुन्हा सुरळीत केली.