Buldhana News : अंगणवाडीच्या जवळ चक्क स्मशानभूमी, प्रशासनाचा भोंगळ कारभार

बुलढाणा (Buldhana) जिल्ह्यातील संग्रामपूर तालुक्यामधील पिंपरी गावात जिल्हा प्रशासनाच्या भोंगळ कारभाराचा धक्कादायक प्रकार समोर आला आहे. या गावातील अंगणवाडीच्या (Anganwadi) इमारतीला लागूनच प्रशासनाने स्मशानभूमी (Crematorium) बांधली आहे. 'स्मशानभूमीत अंगणवाडी आहे की अंगणवाडीत स्मशानभूमी?', असा संतप्त सवाल आता गावकरी विचारत आहेत. या प्रकारामुळे लहान मुले भीतीने अंगणवाडीत येण्यास घाबरत असून, ही अंगणवाडी बंद पडण्याच्या मार्गावर आहे. मुलांअभावी या इमारतीचा वापर आता गुरांना बांधण्यासाठी होत असून, सर्वत्र घाणीचे साम्राज्य पसरले आहे. आदिवासीबहुल भागातील या गावातील मुलांच्या शिक्षणाचा आणि पोषणाचा गंभीर प्रश्न निर्माण झाला असून, प्रशासन याकडे कधी लक्ष देणार याकडे सर्वांचे डोळे लागले आहेत.