नवी मुंबई : रस्त्यावरुन धावताना कार थेट नदीत घुसली, चौघे सुखरुप बाहेर

आपल्याकडील रस्त्यांची अवस्था किती बिकट आहे, हे नवी मुंबईच्या तळोज्यातील एका घटनेतून पुन्हा दिसून आलं. त्याचं झालं असं की, एक कार घोटा नदीच्या पुलावरुन जात होती. मात्र पुलाची कमी उंची आणि संरक्षक भिंत नसल्याने कार थेट नदीपात्रात कोसळली. पाऊस पडत असल्याने नदीचा प्रवाह अतिशय वेगात होता. सुदैवाने कार दगडाला अडकल्याने एका जागी स्थिर झाली. एका चिमुरडीसह या कारमध्ये चौघेजण होते. कारचा पुढचा दरवाजा उघडला आणि त्यातून बाहेर पडत सर्वजण कारच्या टपावर चढले. त्यांनी आरडाओरड सुरु केल्यानंतर गावकऱ्यांनी दोरीच्या सहाय्याने चौघांनाही सुखरुप बाहेर काढलं. त्यामुळे पुढील अनर्थ टळला.