नाशिक : समीर आणि छगन भुजबळ नाशिक दौऱ्यावर, कार्यकर्त्यांकडून स्वागतासाठी जय्यत तयारी

जामिनावर सुटलेले राष्ट्रवादी काँग्रेसचे नेते छगन भुजबळ आणि समीर भुजबळ आज नाशिक दौऱ्यावर आहेत. आपल्या या दौऱ्यात ते कार्यकर्त्यांच्या भेटी घेणार आहेत. भुजबळांच्या स्वागतासाठी नाशिकमध्ये ठिकठिकाणी रांगोळ्या काढण्यात आल्या आहेत, तसंच होर्डिंग्सही लावण्यात आले आहेत.

राष्ट्रवादीचे नेते छगन भुजबळ आणि समीर भुजबळ आज गुरुवारी दुपारी अडीच वर्षानंतर एकेकाळी त्यांचा गड़ समजल्या जाणाऱ्या नाशिकमध्ये दाखल होणार आहेत. शहरात येताच पाथर्डी फाटा परिसरात त्यांच कार्यकर्त्यांकडून जल्लोषात स्वागत करण्यात येणार आहे.

शहरात ठिकठिकाणी भुजबलांच्या स्वागताचे होर्डिग्स लावण्यात आले असून राष्ट्रवादी भवनवर नवचैतन्याची गुढ़ीच उभारण्यात आली आहे. एकेकाळी छगन भुजबळ ज्या राष्ट्रवादी भवनच्या केबिनमधून कार्यकर्त्यांशी संवाद साधत होते ते केबिन देखील आज अडीच वर्षानंतर उघडण्यात आलं आहे.

नाशिकमधील दौऱ्यात छगन भुजबळ आपल्या येवला मतदारसंघातील लोकांच्या भेटीगाठी घेतील. तुरुंगातून सुटल्यानंतर समीर आणि छगन भुजबळ हे पहिल्यांदाच नाशिकला जात आहेत. नाशिकमध्ये भुजबळांच्या जंगी स्वागताची तयारी कार्यकर्त्यांनी केली आहे.