मुंबई : आयपीएल बेटिंगमध्ये अरबाजपाठोपाठ दिग्दर्शक साजिद खानचाही सहभाग?

ठाणे खंडणीविरोधी पथकाने उघड केलेल्या आयपीएल बेटिंग प्रकरणात अभिनेता अरबाज खाननंतर आणखी काही सेलिब्रेटींची नावं समोर येत आहेत. दिग्दर्शक, अभिनेता साजिद खानही बेटिंग प्रकरणात अडकण्याची चिन्हं आहेत.

सात वर्षांपूर्वी साजिद खानने आपल्या माध्यमातून क्रिकेटवर बेटिंग केल्याची माहिती अटकेत असलेला बुकी सोनू जालान याने दिली आहे. त्यामुळे बेटिंगचं बॉलिवूड कनेक्शन पुन्हा एकदा समोर आलं आहे.

आयपीएल बेटिंग प्रकरणात ठाणे खंडणीविरोधी पथकाकडून अटकेत असलेला बुकी सोनू जालान याची कसून चौकशी सुरु आहे. सोनू जालानने साजिदची माहिती पोलिसांना दिल्यामुळे बॉलिवूडमध्ये पुन्हा एकदा खळबळ उडाली आहे. त्यामुळे या प्रकरणात साजिद खानला लवकरच चौकशीला बोलावलं जाण्याची शक्यता आहे.