मुंबई : मुंबईत 24 तासांत तीन ठिकाणी अग्नीतांडव, एकाचा मृत्यू

मुंबईत आग लागण्याच्या घटनांचं सत्र सुरुच आहे. 24 तासांत तीन ठिकाणी मुंबईत आगीच्या घटना घडल्या आहेत. पहिली घटना काल रात्री कांजूरमार्ग येथील सिनेविस्टा स्टुडिओत घडला. या स्टुडिओला लागलेल्या आगीत एकाचा मृत्यू झाला. गोपी वर्मा असं मृताचं नाव असून तो ऑडिओ असिस्टंट होता. आज सकाळी अग्निशमनच्या कर्मचाऱ्यांना गोपी वर्माचा मृतदेह पूर्णपणे जळालेल्या अवस्थेत मिळाला. काल संध्याकाळी स्टुडिओला आग लागली होती. त्यावेळी स्टुडिओत बेपनाह आणि हासिल या दोन हिंदी मालिकांचं शूटिंग सुरु होतं. 
तर दुसरी आगीची घटना घाटकोपरमध्ये घडली. कैलाश ज्योत इमारतीच्या सातव्या मजल्यावरील फ्लॅटला आग लागली. इमारतीतून सर्व रहिवाशांना सुखरूप बाहेर काढण्यात आलंय. तिसरी घटना परळ भागातल्या शिवशक्ती इमारतीच्या पहिल्या मजल्यावरील फ्लॅटला आग लागली. अग्निशमन दलानं तात्काळ घटनास्थळी धाव घेत आगीवर नियंत्रण मिळवलंय.